Ndalohet në Zvicër bosi i naftës Tea Oil, akuzohet për evazion fiskal me vlerë 2.2 mln euro

Prokuroria bën me dije se Interpol Zyrihu ka ndaluar Adrian Xhillarin, një prej të akuzuarve për aferën e kontrabandës së naftës virgine i cili ishte shpallur në kërkim ndërkombëtar prej vitit 2015, pasi nuk iu gjet vendodhja e tij pas caktimit të masës së sigurisë “arrest në burg”. Adrian Xhillari, i shpallur në kërkim prej vitit 2015 si njëri prej personave të përfshirë në skemën e kontrabandës së naftës “virgine” është arrestuar në Zvicër për llogari të drejtësisë shqiptare. Burime nga Prokuroria e Fierit i pohuan BIRN se Xhillari ishte ndaluar javën e kaluar në  Zvicër, ndërkohë që pala shqiptare pret që ai të ekstradohet për t’u përballur me drejtësinë. Ndwrkohw Prokuroria e Përgjithshme ka dërguar menjëherë letër-porosinë e shoqëruar me urdhër-ndalimin dhe dosjen hetimore në ngarkim të Xhillarit, me qëllim ekstradimin e tij në Shqipëri. Administratori i kompanisë “Tea Construksion & Petrol sh.a”, Adrian Xhillari akuzohet  për veprat penale “fshehje e të ardhurave”, “mospagim i taksave” dhe “pastrim i produkteve të veprës penale ose veprimtarisë kriminale” dhe ndaj tij vazhdon të qëndrojë në fuqi masa e sigurimit “arrest në burg” e dhënë në mungesë.  Mbrojtësit e Xhillarit ishin të paarritshëm për një koment ditën e sotme. Çështja në ngarkim të Xhillarit, ish-zv/Drejtoreshës së Përgjithshme të Doganave, Lula Njebza dhe ish-kreut të Degës së Doganës së Tiranës, Mirëarbër Teneqexhiu po shqyrtohet në Gjykatën e Rrethit Gjyqësor Tiranë deri në momentin që Gjykata e Lartë do të vendosë për kompetencën territoriale. Më herët, Gjykata e Rrethit Gjyqësor Fier vendosi të shpallë moskompetencën për gjykimin e kësaj çështjeje duke e dërguar atë në Gjykatën e Tiranës, por kjo e fundit gjeti se vendimi i kolegëve në Fier ishte i paligjshëm dhe vendosi të ankohet në Gjykatë të Lartë për mosmarrëveshje të kompetencës tokësore. Çështja ndaj tre të akuzarve të sipërcituar nisi pas një denoncimi të kryer nga  Crown Agents në Maj të vitit 2015 në Prokurorinë e Fierit. Në Dhjetor të po atij viti, prokuroria urdhëroi ndalimin e Xhillarit,  Njebzës dhe disa doganierëve të tjerë të akuzuar për “falsifikim” dhe “shpërdorim detyre”, ndërsa disa muaj më vonë dosja u dërgua në Gjykatën e Rrethit Gjyqësor Fier për shqyrtim. Sipas prokurorisë, Adrian Xhillari në cilësinë e administratorit të shoqërisë “Tea Construction & Petrol”, ka blerë në maj të vitit 2010 një sasi prej 5.65 milionë kilogramë naftë virgine me vlerë 500 milionë lekë nga rafineria e Ballshit. Në Janar 2014, drejtoria e Doganave, Drejtoria e Tatim Paguesve të Mëdhenj dhe Dogana e Tiranës kanë inspektuar depozitat e kompanisë në Kodër Mëzez në Tiranë për të verifikuar sasinë e naftës virgine që kompania kishte në gjendje, e cila është vlerësuar nga grupi përbashkët i inspektimit në 4.4 milionë litra. Sipas prokurorisë, pas inspektimit në gusht 2014, Xhillari ka ndërtuar në bashkëpunim me të pandehurën Lula Njebza, në atë kohë zv/Drejtoreshë e Përgjithshme e Doganave dhe të pandehurin Mirëarbër Teneqexhiu, me detyrë Drejtor i Doganës së Tiranës një skemë fiktive për zhvendosjen e sasisë së naftës të depozituar në Kodër Mëzez drejt depozitës G-43 në Ballsh, duke i mundësuar kompanisë Tea Construction & Petrol të hedhë në treg në mënyrë të paligjshme, sasinë prej rreth 4.4 milionë litra “naftë virgine” dhe të shmangë detyrimet tatimore të akcizës. Më herët, në lidhje me këtë dosje  u dënuan Alfred Bushi dhe Syrja Misiraj në Gjykatën e Fierit, Bushi mori pafajësi në Apel, ndërsa Misiraj  u dënua me 1 vit burg. Në një procec të mëvetshëm po shqyrtohet çështja edhe ndaj Adrian Alikajt. Pritet që në ditët në vazhdim, autoritetet e drejtësisë zviceriane të vendosin për ekstradimin ose jo të Xhillarit.

Dy zyrtarë të lartë në kurthin e Xhillarit, ju mori 5 milion euro përpara arratisjes  

Disa muaj përpara zbulimit të skandalit me naftën virxhin, Adrian Xhillari, mori 5 milion euro me fajde nga dy zyrtarë të lartë.  Ai premtoi se do të investonte në energjitikë, por 6 muaj më pas u arratis nga Shqipëria pasi prokuroria kishte rënë në gjurmët e shitjes së 4.4 milion litra naftë virxhin. Dy zyrtarët nuk bënë asnjëherë kallëzim për paratë e dhëna “hua”. Adrian Xhillari, një bos lokal nafte në Shqipëri, i shpallur në kërkim në muajin Maj 2015 nga autoritetet shtetërore ka mashtruar edhe dy persona të njohur publikë, duke u marrë 5 milionë euro. Pronari dhe administratori i kompanisë së naftës “Tea Oil” akuzohet nga prokuroria për mospagim taksash në vlerën e 2.2 milionë eurove. Xhillari ka hedhur në treg 4.4 milion litra naftë virxhin me një vlerë rreth 5 miliard lekë. Ai u largua nga Shqipëria pak kohë përpara se gjykata të lëshonte një urdhër-arresti ndaj tij. Në fillim të vitit 2015, Adrian Xhillari, ka kërkuar mes kolegëve shumën e 5 milion eurov, për të realizuar disa investime të tjera në fushën energjitike. Xhillari, i njohur si mik i eksponentëve të rëndësishëm të të majtëve në pushtet në Shqipëri në kohën kur ata kanë qenë në opozitë, nuk e ka pasur të vështirë të bind dy milionerë shqiptarë për t’i huazuar njëri 2 milion euro dhe tjetri 3 milionë euro. Huadhënësit janë persona të njohur dhe me funksione të rëndësishme zyrtare, por investigim.al nuk bën publik emrat e tyre pasi zyrtarët e mashtruar nuk kanë depozituar kallëzim pranë organeve kompetente. Dy zyrtarët kanë besuar se mund të shtonin të ardhurat e tyre pa u lodhur, bazuar në fuqinë ekonomikë të Xhillarit, por sidomos për njohjet e duhura që ai kishte në hierarkinë e lartë shtetërorë dhe administrative. Një ndër këto lidhje, të cilën ai e reklamonte gjithnjë në rrethe biznesmenësh, ishte miqësia me Lula Njebza, ish-zv.drejtore e Përgjithshme e Doganave, e cila ishte në këtë detyrë prej ardhjes në pushtet të Partisë Socialiste, në verën e vitit 2013. Njebza duket se ishte e preferuar e qeverisë së re të majtë, edhe pse ajo ishte larguar nga administrata doganore në vitin 2005, pas një serie shkeljesh të rënda gjatë drejtimit nga ana e saj të Doganës së Durrësit, qytet me portin më të madh bregdetar në Shqipëri. Por ajo që nuk kishte dalë në dritë deri në fillim të vitit 2015, kur Xhillari “arkëtoi” në formë borxhi me interes 5 milion eurot ishte një mashtrim i madh ndaj shtetit, që “Tea Oil” kishte realizuar në Gushtin e vitit 2014. Rreth 4.4 milionë litra naftë e papërpunuar, të gjendura në depozitat e kompanisë së Xhillarit në periferi të kryeqytetit Tiranë, “u zhdukën” pa lënë gjurmë gjatë transportit për në zonën e Ballshit, zona e vetme e përpunimit të gazit të lëngshëm në Shqipëri. Brenda një jave, në harkun kohor 15-21 gusht 2014, kamionë naftëmbajtës të “Tea Oil” dhe kompanive të tjera të transportit, morën të gjithë sasinë e naftës bruto, natyrisht nën mbikqyrjen e segmenteve të caktuara të administratës doganore, dhe e shpërndanë atë në pika karburanti në qytete të ndryshme të Shqipërisë. I sigurt se kjo histori mashtrimi do të zbulohej, Xhillari largohet nga Shqipëria në muajin Maj 2015, duke marrë me vete edhe 5 milionë eurot e dy milionerëve shqiptarë që kishin shpresuar se do të pasuroheshin më tej nga transaksionet financiare të tij. /BIRN/TPZ.AL/