TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pranë këtyre konteinerëve të mbeturinave është edhe tregu i frutave dhe perimeve.
Kjo situatë nuk paraqitet në periferi të Tiranës, por në zonën e shkollës së baletit, një zonë qendrore në kryeqytet dhe ajo është shqetësuese jo vetëm për qytetarët, por edhe për vetë tregtarët.
Ata thonë se janë të detyruar të punojnë në këto kushte. Ata kërkojnë të merren masa të menjëhershme. Prania e koshave të mbetjeve, u ka larguar edhe klientët.
Të shqetësuar janë edhe qytetarët, kërkojnë minimalisht dezinfektim të zonës. Pastrimi i konteinerëve bëhet në çdo orë të ditës, aty pranë produkteve ushqimore dhe blerësve.
Kjo situatë sipas ekspertëve i bënë produktet ushqimore shumë të rrezikshme për shëndetin e konsumatorëve. Dietologia Hyrida Basha thotë se shumë pak tregje në vend përmbushin kushtet higjenosanitare, dhe mundësia e kontaminimit për shkak të faktorëve të jashtëm është shumë më e madhe.
Larja e frutave dhe perimeve, ruajtja e tyre në ambiente të përshtatshme dhe gatimi i mirë, janë këshillat kryesore të dietologëve, nutricionistëve e natyrisht edhe mjekëve.
