TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Armando Broja nuk është duke kaluar momentin e tij më të mirë në “St Mary’s”.
Kundër Uotfordit, Ralf Hazenhytel, nuk e preferoi titullar përkrah Çe Adams dhe ia besoi vendin e sulmuesit 20-vjeçar Stjuart Armstrongut.
Shqiptari u hodh në fushë për Sauthemptonin vetëm në minutën e 46-të, në vend të Smollbon, për të kërkuar golin e barazimit.
Uotfordi kishte kaluar dy herë në avantazh në pjesën e parë falë golave të Kukos në minutën e 14-të dhe 34-t. Elionusi rihapi ndeshjen në minutën e 45-të për vendësit.
Por “Shenjtorët” nuk arritën dot të barazonin, madje Broja nuk e mbylli dot ndeshjen pasi pësoi një dëmtim të frikshëm në shtesë.
Dëmtimi i rrezikshëm – Në një aksion brenda zone, portieri Foster del për të spastruar zonën në një dyluftim ajror ku protagonist kishte Brojën dhe bërryli i tij godet poshtë syrit sulmuesin, duke e lënë të gjakosur dhe të tronditur në fushë.
Pasi merr ndihmën e parë nga stafi mjekësor, për arsye sigurie ai nuk mund të qëndrojë më në fushë dhe zëvendësohet me Long në minutat e mbetura.
Broja arrin të dalë nga fusha me këmbët e tij, por tani pritet të bëjë të gjitha testet për të konfirmuar se goditja poshtë zgavrës së syrit nuk ka pasoja të tjera veç ënjtjes. Kjo ishte ndeshja e gjashtë radhazi e sulmuesit të Çelsit që nuk arrin të gjejë rrugën e golit në Premier Ligë.
Hera e fundit që Broja ka shënuar në kampionat, ka qenë pikërisht ndaj Totenhemit në fillim të muajit shkurt. Por golin e fundit me fanellën e Sauthemptonit ai e realizoi ndaj Uest Hemit në 1/8-at e Kupës FA.
Nëse nuk do të ketë frakturë dhe pasoja të tjera nga tronditja, ndeshja e radhës për Sauthemptonin është të dielën kundër Mançester Sitit, e vlefshme për çerekfinalen e Kupës FA.
Por dëmtimi i Brojës shqetëson jo pak edhe Edi Rejën, në prag të dy miqësoreve të Shqipërisë në fund të muajit mars.
Kuqezinjtë do të luajnë testin e parë kundër Spanjës më 26 mars, ndërkohë që tri ditë më vonë do të presim Gjeorgjinë.
