TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Legjionarët shqiptarë vijojnë të bëjnë paraqitje të mira në Europë, teksa kanë dhënë edhe këtë fundjavë kontributin e tyre në sfidat e skuadrave përkatëse. Kjo ka qenë java e asisteve për dy nga futbollistët kuqezi, teksa bie në sy edhe debutimi i Etrit Berishës me fanellën e Torinos.
Gardiani i portës shqiptare tregoi cilësinë e tij në ndeshjen ndaj Bologna-s, duke i dhënë mjaft siguri prapavijës së Torinos dhe duke e mbajtur të paprekur për 90 minuta portën e skuadrës së tij. Berisha u vlerësua me notën 7.2 nga uebsajti i specializuar për statistika, “SofaScore”.
Ndërkaq, në La Liga, Myrto Uzuni bëri mjaft mirë në radhët e Granadës, duke treguar klasin e tij. Futbollisti shqiptar u tregua i rrezikshëm që në minutat e para të lojës, ndërsa krosi i tij në minutën e 56-të detyroi portierin kundërshtar të gabojë, duke e çuar topin në rrjetë
Në Turqi, Bekim Balaj ishte ëngjëll e djall këtë fundjavë për Bolusporin. Në minutën e 42-të, sulmuesi shqiptar dhuroi një asist fantastik për Kasongon, i cili gjeti golin e avantazhit, ndërsa me nisjen e pjesës së dytë, Balaj u largua nga loja me karton të kuq.
Sakaq, i riu shqiptar, Kristjan Asllani vazhdon të mahnisë skuadrat e Serisë A në Itali, teksa ka bërë një paraqitje mjaft të mirë në radhët e Empolit, në ndeshjen ndaj Genoa-s ditën e diel. Pjesë e formacionit ishte edhe mesfushori Nedim Bajrami, teksa të dy kuqezinjtë u vlerësuan me notën 7.2 nga SofaScore.
“Roma – Atalanta” u përkthye në një derbi shqiptarësh këtë fundjavë në Itali, ku në kryeqytetin italian zbarkoi Gjimshiti me shokë, përballë Marash Kumbullës së Mourinho-s. Gjimshiti u aktivizua vetëm për 9 minuta në këtë sfidë, teksa Kumbulla u aktivizua për 90 minuta, ku bëri mjaft mirë në repartin difensiv.
Në Zvicër, dy shqiptarët Ermir Lenjani dhe Amir Abrashi kanë luajtur si titullar në ndeshjen e fundjavës që ekipi i tyre Grasshopers zhvilloi ndaj Servette-s. Madje, Lenjani dha edhe asistin e golit të parë të ekipit zviceran, që gjithsesi e humbi sfidën me shifrat 4-2. Abrashi luajti për 90 minuta, ndërsa Lenjani u zëvendësua në minutën e 72-të të takimit.
Të tjerë futbollistë kuqezi u aktivizuan në radhët e klubeve europiane, duke treguar formën e mirë që po kalojnë. Në fund të muajit mars, më 26 dhe 29 mars, Shqipëria do të luajë ndaj Spanjës në transfertë e Gjeorgjisë.
