TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Aksioni kombëtar për formalizimin e tregut bujqësor dhe blegtoral ka sjellë bllokimin e 94 tonëve produkte gjatë kontrolleve të zhvilluara në disa qarqe të vendit.
Ministrja e Bujqësisë dhe Zhvillimit Rural, Anila Denaj, njoftoi se operacioni synon të garantojë që çdo mall të jetë i deklaruar dhe i gjurmueshëm, duke ndaluar tregtimin në shkelje të legjislacionit tatimor dhe duke mbrojtur prodhuesit e ndershëm.
“94 tonë produkte bujqësore dhe blegtorale janë bllokuar gjatë kontrolleve në terren në kuadër të aksionit kombëtar për formalizimin dhe sigurimin e gjurmueshmërisë nga grumbulluesit, përpunuesit dhe tregjet me shumicë,” deklaroi Denaj.
Sipas saj, aksioni është pjesë e një fushate për rritjen e sigurisë ushqimore dhe eliminimin e praktikave të paligjshme që dëmtojnë si bujqit ashtu edhe konsumatorët.
Fushata, e nisur më 14 korrik në Tiranë nga strukturat e Administratës Tatimore dhe Ministrisë së Bujqësisë, është shtrirë tashmë edhe në qarqe të tjera. Kontrollet po kryhen me bazë risku për të përmirësuar gjurmueshmërinë dhe për të forcuar standardet e tregut ushqimor në vend.
