TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Bajern dhe futbolli brazilian kryeqëzojnë sërish rrugët. Ndeshja e 1/8-ave e finaleve mes Bajernit dhe Flamengos në Kupën e Botës për Klube në SHBA është vetëm përballja e dytë e madhe midis kampionëve në fuqi të Gjermanisë dhe një klubi nga vendi i sambës.
Në vitin 1976, Bekenbauer, Gerd Myler me shokë sollën Kupën e Botës në “Säbener Straße” për herë të parë në dy ndeshje kundër Kruzeiro Belo Horizonte (2-0 / 0-0). Megjithatë, në turnetë e Kupës së Botës Mini për Klube në vitet 2013 dhe 2020 (2021), përfaqësuesit brazilianë Atletico Mineiro dhe Palmeiras çuditërisht dështuan të avanconin në gjysmëfinale.
DËSHTIMET NË TRANSFERIME DHE LEGJENDAT NGA BRAZILI – Në vitin 1991, lojtarët e parë brazilianë që iu bashkuan Bajernit ishin Bernardo (për tre muaj të plotë) dhe Mazinjo (deri në vitin 1994). I pari konsiderohet si një nga lojtarët më të dobët që ka veshur ndonjëherë fanellën e Bajernit në Bundesligë. Në një moment, pati edhe thashetheme se një vëlla më pak i talentuar i futbollistit origjinal ishte dërguar në Mynih. Edhe Mazinjo nuk arriti ta afirmonte veten Zhorginjo, i cili fitoi Kupën e Botës në SHBA me Brazilin si lojtar i Bajernit në vitin 1994, ishte i një cilësie tjetër, por u largua nga bavarezët pas vetëm dy vitesh e gjysmë. Sulmuesit Xhovane Elber (1997- 2003), Ze Roberto (2002- 2007) dhe Lusio (2004-2009) gëzojnë pak a shumë status legjendar te Bajerni dhe tifozët e këtij klubi, ashtu si fituesit e Ligës së Kampioneve në vitin 2013, Dante dhe Rafinja.
PELE DHE BAJERNI 1966 – Por kush nuk e di sot (ende) mund ta mësojë se një ish-president i Bajernit donte të ndërmjetësonte një marrëveshje me një madhësi krejtësisht të ndryshme në vitin 1966… Roland Endler, multimilioner dhe president i Bajernit nga viti 1958 deri në vitin 1962, donte të joshte një nga lojtarët më të mëdhenj të futbollit të të gjitha kohërave, Edson Arantes do Nascimento ose shkurt Pelé, në Mynih. Legjenda braziliane e futbollit, i cili vdiq në vitin 2022, e konfirmoi këtë në një intervistë në shtator 2012. “Kisha oferta nga Milani, Madridi, por oferta më konkrete ishte nga Bajerni. Presidenti i atëhershëm (Roland Endler) më kontaktoi drejtpërdrejt duke më thënë: ‘Nëse do të vish në Mynih, atëherë do ta bëjmë’. Roland ishte një tifoz i vërtetë i imi. Kur dëgjoi se do të martohesha, më ftoi në muajin tonë të mjaltit në Gjermani dhe vazhdonte të thoshte: ‘Duhet të vish të luash edhe për Bajernin’. Por unë ndihesha rehat në Brazil. Nuk doja të largohesha. Më vonë, u transferova te Kozmos Nju Jork, sepse presidenti premtoi të ndërtonte një ekip të mirë me Franc Bekenbauer etj. Kjo është arsyeja pse u transferova përsëri, për të ndihmuar në përparimin e futbollit në SHBA”. Miqësia me Santosin – Pelé i qëndroi besnik skuadrës së tij të fëmijërisë Santos FC për 18 vjet (1956-1974), duke shënuar 567 gola në 583 ndeshje zyrtare, përpara se të transferohej në SHBA në vitin 1975 në moshën 34 vjeç. Ai ishte vërtet mik i ngushtë me Endlerin. Industrialisti gjerman, ashtu si ai vetë, ishte Qytetar Nderi i Santos dhe Kryetar Nderi i skuadrës Santos FC. Megjithatë, në intervistën e vitit 2012, Pelé nuk e dinte më, ose më saktë, e kishte harruar, se në vitin 1966 nuk ishte Endler, por Vilhelm Nojdeker ai që kishte qenë president i Bajernit për katër vjet.
PELÉ ME BEKENBAUER DHE MYLER TE BAJERNI… – Në përgjithësi, një histori sa legjendare aq edhe praktikisht e panjohur. Imagjinoni: Pelé, së bashku me Franc Bekenbauer dhe Gerd Myler, kishin tronditur Bundesligën dhe të gjithë futbollin europian nga viti 1966 deri në vitin 1974. Tifozët më të vjetër të Bajernit me siguri do të buzëqeshin me mendime të tilla.
