TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryedemokrati Lulzim Basha, do t’iu bashkohet sot protestuesve në rrethrrotullimin e Milotit, ku do të bllokohet për 60 minuta lëvizja e automjeteve. Akset e tjera të cilat do të bllokohen janë rrethrrotullimi i Bradasheshit në Elbasan, autostrada Plepa-Kavajë në Durrës, rrethrrotullimin i Sheqit në Fier si dhe rrethrrotullimi i ish-sheshit “Shqiponja” në Tiranë.
Ndërkohë që opozita përgatitet për mosbindjen civile, një paralajmërim vjen nga maxhoranca. Kryetari i grupit parlamentar të PS, Taulant Balla ka paralajmëruar kreun e PD, Lulzim Basha që mos bllokojë rrugët dhe mos vandalizojë institucione dhe biznese sepse do të përballet me ligjin.
“Basha dhe Kryemadhi kanë vendosur të bllokojnë sot të gjitha akset më të rëndësishme kombëtare, pro një gjë është e sigurt, nuk mund të bllokojnë dot reformën në drejtësi. Nuk mund të bllokojnë sot miratimin e këtij ligji sikurse nuk kanë mundur prej 2016 të bllokojnë paketën, ndryshimet kushtetuese dhe ligjin për vetingun. Në vazhdën e këtyre protestave të dhunshme që dëmtojnë ekonominë, turizmin, konsumin. Ishim para pak minutash në Rinas teksa u hodh themeli i një prej hoteleve më të rëndësishme me 5 yje në Shqipëri. Një kompani gjermane, ka vendosur të investojë përsëri në Shqipëri.
Përfaqësuesi i kësaj kompanie gjermane teksa mori fjalën tha erdha nga Mynihu me një avion të mbushur me turistë gjermanë. E turistëve gjermanë sot teksa shkojnë për në Vlorë do ti dalë përpara Luli dhe Monika për tu zënë rrugën për të mos shijuar bukuritë e turizmit shqiptar. E teksa një gjerman do të pyesë gjermanin tjetër se çfarë hall kanë këta, po ju themi nga këtu:
Halli i tyre është reforma në drejtësi. Prandaj bllokojnë rrugët. Të bllokosh rrugët sot do të thotë është të mundohesh të pengosh sado pak. Por nuk kanë për t’ia arritur. Ky është halli i biznesit të kunatit, nuk është halli i biznesit të një qytetari të ndershëm që punon për të mbajtur familjen.
Përballë kësaj vale dhune dhe përpjekje për të penguar shqiptarët të lëvizin nëpër rrugët e Shqipërisë, përgjigjja është vetëm një. Dëgjoje Lulzim: Ke gjithë të drejtën të protestosh kur të duash, sa herë të duash, por harroje të nxisësh dhunë, të kryesh akte vandalizmi, të godasësh policinë, institucionet, të terrorizosh njerëzit se ke për tu përballur me ligjin, qoftë ti, qoftë kushdo tjetër që tenton të bllokojë rrugë, të dhunojë institucione, të vandalizojë biznese private”, u shpreh Balla.
