TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kuvendi i Shqipërisë ka përjashtuar për dhjetë ditë dy deputetët e PD-së Edi Paloka dhe Bujar Leskaj.
Këtë të premte, u mblodh Sekretariati për Procedurat, Votimet dhe Etikën dhe ka pranuar kërkesën e deputetëve të Partisë Socialiste për të përjashtuar nga pjesëmarrja në komisione dhe në seancë plenare për dhjetë ditë dy demokratët që u përfshinë në një debat të ashpër një ditë më parë në seancë plenare.
Ndër deputetët që firmosën ndëshkimin e dy deputetëve demokratë ishin ish-ministrja Etilda Gjonaj, deputeti Toni Gogu dhe deputetja Blerina Gjylameti. Sipas dokumentit të dorëzuar në sekretari, deputetët e mazhorancës kërkuan përjashtimin e deputetëve demokrat për dhjetë ditë nga komisionet parlamentare dhe nga Kuvendi.
Kërkesa
Baza Ligjore: Rregullorja e Kuvendit, neni 63 pika “ç”, “Masa Disiplinore” dhe neni 65/1 “Masa disiplinore e përjashtimit nga pjesëmarrja në komisione dhe/ose në seancë plenare deri në 10 ditë”
E nderuar zonja kryetare e Kuvendit,
Lidhur me fyerjen e rëndë të etikës parlamentare, në seancën plenare të Kuvendit të Shqipërisë të datës 10.11.2022, nga dy deputetët e Grupit Parlamentar të Partisë Demokratike, Bujar Leskaj dhe Edi Paloka, të cilët ndoshta nën ndikimin e pijeve alkoolike përdorën një gjuhë të rëndë fyese, si dhe u sollën në mënyrë të pahijshme përpara zhvillimit të procesit të votimit të projektligjeve që shqyrtoheshin në ketë seancë, në një grup deputetësh paraqesim këtë kërkesë: Bazuar në Rregulloren e Kuvendit, neni 63, pika “ç” dhe neni 65/1, kërkojmë marrjen e masës disiplinore “përjashtim nga pjesëmarrja në komisione dhe në seancë plenare deri në 10 ditë; mbledhjen e Sekretariatit për Procedurat Votimet dhe Etikën për vlerësimin dhe marrjen e masës së propozuar prej nesh”, thuhet në kërkesën e deputetëve socialistë.
Ndërkohë më vonë, reagoi edhe Kryeministri Rama përmes një postimi në “Facebook”, duke i akuzuar deputetët demokratë si të pirë, të shitur dhe pa fe e pa atdhe. Në një postim në “Twitter”, kreu i qeverisë tha se seanca u mbyll me dy të dehur nga “Foltorja”, të cilët shanë me libër shtëpie në emër të popullit.
Rama ka kritikuar qëndrimet e opozitës në seancën maratonë që zgjati dy ditë ku u diskutua buxheti 2023. Kryeministri tha se në 28 orë diskutime, asnjë nga partitë opozitare nuk pranuan që ka luftë në Ukrainë dhe asnjë nuk foli për lidhjen e këtij konflikti me krizën e çmimit të energjisë dhe inflacionit.
“Pas 28 orësh seancë diskutimesh për buxhetin 2023, as PD-ja, as PF-ja dhe as PL-ja(Partia e Lekut) nuk pranuan që ka luftë, nuk folën për asnjë lidhje mes luftës së Putinit, krizës së çmimit të energjisë dhe inflacionit të luftës, nuk thanë asnjë llaf për ½ milionë USD të marra nga rusët.
Seanca u mbyll me dy të dehur nga rruga e Foltores që shanë me libër shtëpie në emër të popullit dhe mbetën pa bërtitur ‘Shqipëria në Rrezik’ se harruan tekstin prej alkoolit. 3 parti bedelësh pa atdhe, pa din e as iman, me dy të shitur në ballë e dyzet të shkalafitur vërdallë”, shkroi Rama.
