TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ka mjaftuar një gol i Nikolas Gonzalez që Fiorentina të marrë tri pikë të rëndësishme në luftën për një vend në kupat e Europës. Sulmuesi argjentinas arriti të shënonte golin e vetëm në fitoren minimale kundër Empolit (1-0), ndërsa këta të fundit u detyruan të luanin me dhjetë lojtarë pas ndëshkimit me karton të kuq të Lupertos.
Ndeshja nisi vrullshëm nga të dyja ekipet që kërkuan menjëherë të ndryshonin rezultatin, por në asnjë rast ekipet nuk u treguan të qartë përballë portës. Saponara arriti të rrezikonte portën e Empolit, por goditja e tij shkoi ngjitur me shtyllën e portës së mbrojtur nga Vicario.
Empoli sakaq gjeti edhe rrugën e rrjetës në minutën e 39-të pas një paqartësie në zonën e Fiorentinës. Di Francesko shënoi një gol mjaft të bukur me një goditje akrobatike, por sistemi VAR anuloi gjithçka për një faull të Pinamontit në dëm të portierit.
Në pjesën e dytë, Fiorentina e nisi në sulm dhe gjeti rrugën e rrjetës me anë të Arthur Cabral, por sërish gjyqtari anuloi gjithçka për një pozicion jashtë loje.
Luperto u ndëshkua me karton të kuq në minutën e 57-të ndërsa në aksionin pasardhës, Nicolas Gonzales arriti të zhbllokonte edhe rezultatin në minutën e 58-të. Një harkim në zonë nga Biraghi, shkoi në kokën e sulmuesit argjentinas që më pas e ndali topin në rrjetë.
Ky ishte edhe goli që vulosi rezultatin final të takimit me Fiorentinën që doli nga ky takim me tre pikë që e çojnë në kuotën e 50 pikëve, 2 më pak se vendi i pestë që të çon në Europa League dhe 1 më pak se vendi i gjashtë që të çon në Conference League.
