Në takimet që ka pasur në Sofie, me Presidentin e KE, Zhan Klod Junker dhe me Komisionerin e Zgjerimit, Johanes Hahn, kryeministri Edi Rama duket se është mburrur për 613 kilogramë kokainë që u kap në Maminas.
Në prononcimin pas takimit, Rama përsëriti edhe njëherë faktin se kokaina u kap nga autoritetet shqiptare, madje duke përmendur se në portet e Bashkimit Europian, ngarkesa me kokainë iu shpëtoi kontrolleve.
“Operacioni i fundit i agjensive tona ligjzbatuese, Hetimi Doganor, Policia e Shtetit dhe me mbështetjen e Prokurorisë pati një jeohnë shumë pozitive dhe u vlerësua me pozitivitet maksimal duke pasur parasysh që ngarkesa e kapur përbën, jo vetëm një sasi që është më e madhja e kapur ndonjëherë prej nesh, por edhe se ka kaluar në portet e BE dhe iu ka shpëtuar kontrolleve. Ashtu sikundër ishte po kaq e rendësishme edhe vetëdija se ky ishte një operacion mirëfilli agjensive tona ligjzbatuese pa asnjë sinjalizim nga partnerët” u shpreh kryeministri.
Deklarata e Ramës se nuk ka pasur bashkëpunim me partnerët bie ndesh me deklaratat e Ministrit të Brendshëm, Fatmir Xhafaj dhe ambasadorit amerikan, Donald Lu. Xhafaj falenderuan agjensitë partnere pas operacionit, kurse ambasadori amerikan falenderoi DEA-n.
