TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shqipëria doli sot për herë të pestë në tregjet e kapitalit për një eurobond. Burime nga tregu ende me të dhëna parapraka konfirmojne se nga 700 milionë euro që autorizonte ligji dhe që ishte synimi i emetimit janë emetuar 650 milionë euro me interes 3.75 per qind dhe afat maturimi 10 vjet.
Të njëjtat burime thanë se sipas të dhënave paraprake kërkesa e investitorëe ishte 1.2 miliardë euro çka e bën raportin e mbulimit 1.85 një kërkesë kjo mesatare në gjykimin e ekspertëve të tregut. Ulja e shumës nga 700 milionë euro në 650 duket se lidhet pikërisht me përmirësimin e raportit të mbulimit që do të ishte edhe më e ulët në variantin fillestar.
Në raport me eurobondin e kaluar të emetuar një vit më parë Shqipëria ka bërë hapa pas të paktën sa i takon interesit të investitorëve ku kërkesa ishte 3.2 miliardë duke rezultuar me një raport mbulimi gati 5 herë në raport me shumën e kërkuar që ishte 650 milionë euro.
Në raport me vende të tjera të rajonit që kanë qenë aktive së fundmi në tregjet e kapitalit rasti më i freskët është Serbia. Kjo e fundit emetoi 1 miliardë euro dhe kërkesa e investitorëve ishte 3 miliardë duke çuar raportin e mbulimit në 3 herë një nivel ky i kënaqshëm per Serbinë ku autoritetet u shprehën entuziaste lidhur me këtë interes dhe se ishte shumë më lart se prishmëritë që kishin.
Ky është eurobondi i pestë i qeverisë shqiptare. Dalja e parë ishte në vitin 2010, me vlerë 300 milionë euro. Ajo arriti të siguronte një interes në kupon fiks prej 7.5% dhe afat maturimi 5-vjeçar.
Dalja e dytë e Shqipërisë ishte më 5 nëntor 2015, për 450 milionë euro. Kuponi fiks i siguruar në këtë dalje ishte 5.75%, me maturim 5-vjeçar.
Dalja e tretë në 2018 për Shqipërinë në tregjet e kapitalit shënoi një interes më të favorshëm se Eurobondet e mëparshme. Nga kjo dalje u emetuan 500 milionë euro, me një kupon fiks prej 3.50% dhe afat maturimi 7-vjeçar.
Në qershor të 2020-s, Shqipëria regjistroi daljen e katërt, ku u emetuan 650 milionë euro, me një ofertë nga investitorët rreth 3.2 miliardë euro, me kupon 3.5%, interes 3.625% dhe maturim 7-vjeçar.
Luhatja e interesave në emetimet e eurobondeve gjatë viteve ka qenë e lidhur me kushtet në tregjet ndërkombëtare në momentet përkatëse.
Shqipëria ka një stok borxhi në instrumentin që njihet si Eurobond në vlerën 1.15 miliardë euro. Rritja e tij, me një vlerë prej 650 milionë eurosh, sa tregojnë të dhënat paraprake se ka emetuar do ta çojë atë në vlerën 1.8 miliardë euro.
