TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti i FIFA-s, Gianni Infantino, në një intervistë për DAZN ka theksuar rëndësinë dhe ndikimin e madh që pritet të ketë Kupa e re e Botës për Klube me 32 ekipe, e cila nis më 16 qershor 2025 në Miami dhe përfundon më 13 korrik në New York/New Jersey.
“Unë vij nga një sfond në Evropë, ku ka klube të nivelit të lartë dhe gara të shkëlqyera, por si tifoz futbolli, klubeve të tjera jo-evropiane nuk u është dhënë kurrë një skenë e vërtetë për të performuar,” tha Infantino, duke nënvizuar nevojën për një turne të barabartë për të gjitha kontinentet.
“Për të rritur futbollin e klubeve, i cili përbën 80% të futbollit në mbarë botën, na duhet një garë globale për t’u dhënë mundësi të gjitha këtyre klubeve që investojnë shumë në krijimin dhe zhvillimin e talenteve,” shtoi ai.
Infantino u shpreh se kjo garë do të jetë një hap drejt një futbolli vërtet global, ku shpresa dhe mundësitë nuk janë më të përqendruara vetëm në disa vende elitare.
“Ajo që duam të arrijmë është të shkojmë drejt futbollit të globalizuar. Ne themi se është sporti numër një në botë, dhe është. Por elita është e përqendruar në shumë pak klube, në shumë pak vende. Ne duam t’u japim shpresë dhe mundësi Mamelodi Sundowns nga Afrika e Jugut, Ulsan nga Koreja e Jugut, Auckland City nga Zelanda e Re.”
Presidenti i FIFA-s e përshkroi këtë format si revolucionar jo vetëm për klubet, por edhe për lojtarët.
“Një mik shumë i mirë i imi është George Weah, fitues i Topit të Artë dhe ish-president i Liberisë. Ai nuk luajti kurrë në një Kupë Bote, por do të kishte luajtur në një Kupë Bote për Klube.”
Në lidhje me ndikimin ekonomik të këtij turneu, Infantino tha:
“Me të ardhura prej rreth 2 miliardë dollarësh, çdo ndeshje do të vlente 30 milionë dollarë. Nuk ka asnjë garë tjetër klubesh në botë që vlen 30 milionë dollarë për ndeshje.”
Një tjetër aspekt kyç është aksesueshmëria për publikun në mbarë globin:
“Të gjitha ndeshjet do të transmetohen drejtpërdrejt dhe falas. Për mua, futbolli i përket popullit. Më tregoni një garë kryesore ku mund të shikoni futbollin e klubeve falas. Futbolli i kombëtareve ofron ndonjëherë ndeshje falas sepse qeveritë e detyruan këtë, por ligat e klubeve jo.”
“Mund të jesh në Timbuktu, Hanoi, New York, Londër, Romë apo Madrid dhe mund të shikosh Kupën e Botës për Klube, me lojtarët dhe klubet më të mirë në botë – falas. Nuk është keq, apo jo?” përfundoi Infantino, duke nënvizuar qasjen demokratike dhe përfshirëse që synon FIFA.
Në këtë turne do të marrin pjesë 32 klube nga 20 vende dhe 6 konfederata të ndryshme, me futbollistë nga 81 shtete, duke e kthyer këtë turne në një spektakël me përmasa të vërteta globale.
