TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Teksa ka arrestuar kosovarin Ragip Haxhihajdini, policia ka kryer kontrolle në banesën që ai ka tek “Shkëmbi i Kavajës”.
Gjatë kontrollit nuk u gjend asnjë send i paligjshëm, ndërkohë vetë kosovari në momentin e pyetjes në polici ka pranuar se ka njohje me Admir Murataj dhe Klemend Çalën. Haxhihajdini thirrej nga personat e grupit si “Daja”, pasi ishte nga Kosova, banor i qytetit të Pejës.
Haxhihajdini u identifikua nga dëshmia e bashkëpunëtorit të prokurorisë Alkond Bengasi. Ishte pikërisht ky i fundit që ka identifikuar Haxhiahajdinin në zonën e “Shkëmbit të Kavajës”.
Në operacionin për kapjen e tij ka asistuar dhe Bengasi, i cili në paraqitjen për njohje ka arritur të njohë kosovarin që e kishte parë në shoqëri me Admir Murataj dhe mikun e tij Klemend Çala. RagipHaxhihajdini u arrestua nga policia në zonën e plazhit në Durrës, pasi aty kishte një banesë të tijën tek “Shkëmbi i Kavajës”. 50-vjeçari nga Peja u zbulua falë dëshmisë së bashkëpunëtorit të drejtësisë, Alkond Bengasit, të arrestuar për grabitjen, njëherësh kushëri i Klement Çalës, në kërkim si një nga organizatorët e vjedhjes së miliona eurove në pistën e avionëve në Rinas.
Dëshmia e Bengasit zbuloi kosovarin
Ishte Alkond Bengasi që përmendi në dëshminë e tij se Admir Murataj, që mbeti i vrarë pas shkëmbimit të zjarrit me policinë pas grabitjes, takohej me një kosovar tullac nga Kosova. Ai është përshkruar nga Bengasi si “Daja” nga Kosova, i cili takohej shpesh me Klement Çalën dhe Admir Muratajn.
Arrestimi i Ragip Haxhihajdinit, e çoi në gjashtë numrin e personave të vënë para drejtësisë për grabitjen në aeroport, ndërsa Alkond Bengasi është i vetmi që është penduar dhe ka folur. Ai thotë se vetëm ka bërë modifikimin e furgonit me mbishkrimin “Hetimi Tatimor” me të cilën 5 grabitësit u futën në aeroport, por nuk kishte dijeni se ai do të përdorej për vjedhjen e parave të bankës teksa do transportoheshin për në Vjenë.
Ragip Haxhihajdini, i cili njihet edhe me mbiemrin Hajdini, ishte në kërkim edhe nga autoritet në Kosovë, pasi atje është akuzuar për vjedhjen e 25 kg ar në Dhomën e Dëshmive në Policinë e Pejës 7 vjet më parë, dhe i dyshuar për grabitjen e një banke në Istog ku mbeti i vrarë edhe një efektiv i policisë. Duke qenë se sipas së dëshmisë së Alkondit, kosovari rrinte shpesh nën shoqërinë e Klement Çalës dhe Admir Muratajt, hetuesit dyshojnë që Hajdini të ketë pasur rol organizatori në këtë grabitje.
Plani dyshohet të jetë thurur në një restorant në zonën e Shkëmbit të Kavajës ku jetonte kosovari, por edhe në zonën e Liqenit të Thatë në Tiranë, ku siç tregon Alkond Bengasi, ata takoheshin shpesh me njëri-tjetrin.
Nga arratia në grabitjet e bankave
Edhe pse në arrati nga vitit 2013 kur ishin arratisur nga burgu grek i Trikallasë, Admir Murataj dhe Klement Çala lëviznin të lirë në Shqipëri, e madje në zonën e liqenit të Thatë në kryeqytet, kishin hapur edhe një restorant.
Sipas dëshmisë së Bengasit, gjashtë ditë para grabitjes së Rinasit është parë në zonën e Liqenit të Thatë, në shoqërinë e Muratajt, duke udhëtuar me një automjet “Golf” ngjyrë të bardhë me targa të Kosovës. Kjo dëshmon sipas hetuesve miqësinë e ngushtë që kishin Murataj dhe Haxhihajdini, të cilët e thërrisnin njëri-tjetrin me nofkën “Daja”. Për të përcaktuar qartë se cilët ishin 5 grabitësit që përshkruan pistën me furgonin “Hetimi Tatimor”, autoritetet shpresojnë në gjurmët e gishtërinjve të gjetura në furgon, përmes të cilave do të zbulohet nëse “Daja” nga Kosova ka qenë vetëm pjesë e thurjes së planit, apo ka marrë pjesë drejtpërdrejt në grabitje.
Nga të arrestuarit në pistë dyshohen të kenë hyrë, Oltion Veseli dhe Elton Pikli, ndërsa Alkond Bengasi (i penduar i drejtësisë), Saimir Çela dhe Renaldo Sula akuzohen si bashkëpunëtorë. Në kërkim janë Talo Çela, vëllezërit Klement dhe Eldi Çala, Marenglen Hoxha, ish-punonjës policie, një tjetër ish-efektive, Edlira.B, i kërkuari për grabitje të tjera, Aleks Pepa dhe dy të tjerë. Ndërkohë që koka e grupit, Admir Murataj nga Tropoja, i arratisur në 2013 nga burgu grek u vra gjatë shkëmbimit me policinë.
Të arrestuar
1. Oltion Veseli 38 vjeç nga Kruja (dyshohet autor i grabitjes)
2. Elton Pikli 40 vjeç nga Kruja (dyshohet autor i grabitjes, me profesion kasap)
3. Alkond Bengasi34 vjeç nga Elbasani (i penduar i drejtësisë, dyshohet bashkëpunëtor), me banim në Tiranë
4. Saimir Çela 28 vjeç nga Kajani i Elbasanit (bashkëpunëtor)
5. Renaldo Sula25 vjeç nga Elbasani(bashkëpunëtor)
6.Ragip Haxhihajdini nga qyteti i Pejës Kosovë
Në kërkim si autor direkt në grabitje
1. Talo Çela, nga Elbasani, (dyshohet të jetë autor direkt në grabitje) pronar i vilës ngjitur me servisin ku u modifikua furgoni
2. Klement Çala 31 vjeç nga Elbasani, i shpallur në kërkim për grabitjet që në vitin 2015
3. Eldi Çala (ka blerë servisin në Karakullak ku u modifikua furgoni i grabitjes) – bashkëpunëtor, vëllai i Klement Çalës
4. Marenglen Hoxha, ish-punonjës policie (dyshohet të ketë dhënë infromacion tek grabitësit për furgonet që transportonin paratë)
5. Aleks Pepa nga Elbasani i shpallur në kërkim për grabitjen e parë brenda aeroportit në qershor 2016
6.Edlira.B. një ish-efektive e komisariatit të Yzberishtit
I vrarë pas grabitjes
1. Admir Murataj nga Tropoja, i arratisur në 2013 nga burgu grek, ishte në kërkim për dy grabitje të tjera në Shqipëri, në 2015 tek Stacioni i Trenit në Tiranë dhe 2017 në Qafë-Kashar. U vra gjatë shkëmbimit me policinë.
/Shqiptarja.com/
