TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Në ceremoninë liturgjike ”Via Crucis” në Koloseum, Papa Françesku, jo pa dhimbje, tha se ”bota është copëtuar”.
Mbrëmjen e djeshme ”Via Crucis” tradicionale është riti më i përzemërt i së Premtes së Madhe.
Tekstet e meditimeve u përgatitën nga vetë papa Françesku, ndërsa lutja u drejtua nga famullitari i Romës, kardinali Baldo Reina, i deleguar nga vetë Ati i Shenjtë.
Një botë copë-copë, një botë e hedhur poshtë dhe ekonomia që vret janë në qendër të meditimeve që papa Françesku përgatiti për ”Via Crucis”.
Ky është viti i tretë radhazi, pa ndonjë surprizë të minutës së fundit, që papa, për arsye shëndetësore, nuk mund të kryesojë ritin, edhe sepse ai u zhvillua jashtë dhe në mbrëmje.
Një gjendje e vështirë për një papë, i cili, përveç shtrimit të fundit në spital, ka pasur gjithmonë një farë brishtësie në rrugët e frymëmarrjes.
Dhimbja për një botë që ka nevojë për paqe dhe që shpesh nuk njeh vëllazëri ishte filli i përbashkët i lutjeve të përgatitura nga papa për të Premten e Madhe.
Por, ka vend edhe për një thirrje për unitetin e kishës dhe për rolin që gruaja ka në historinë e krishterë.
Para ”Via Crucis”, në Bazilikën e Shën Pjetrit u kremtua riti i Pasionit, i kryesuar nga kardinali Claudio Gugerotti, i deleguar edhe nga papa Françesku.
Të pranishëm në ceremoni ishin edhe zëvendëspresidenti amerikan JD Vance, gruaja e tij Usha dhe tre fëmijët e tyre.
”Në një botë copë-copë ka nevojë për lotë të sinqertë, jo lot sipas rrethanave”, shkruan Papa në tekstet e ”Via Crucis”.
“Jezus… na sill të gjithëve në paqen e Shabatit dhe do të ketë paqe mbi popullin tënd dhe midis gjithë kombeve”, shtoi ai.
Në ngjarjen e mbrëmshme kishte edhe punonjës shëndetësorë, emigrantë, persona me aftësi të kufizuara dhe vullnetarë që e kaluan kryqin dorë më dorë.
Në meditimet e tij, papa Françesku thekson më tej se “një ekonomi ku 99 vlen më shumë se një është çnjerëzore. E megjithatë, ne kemi ndërtuar një botë që funksionon kështu, një botë llogaritjesh dhe algoritmesh, logjike të ftohtë dhe interesash të paepura”.
”Duhet të refuzojmë një ekonomi që vret dhe flak dhe që i konsideron njerëzit si numra. Kundër ferrit, ekziston ekonomia e Zotit që nuk vret, nuk hedh, nuk dërrmon”, tha ai.
