TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Mijëra protestues dolën në rrugë në qytete të ndryshme të Shteteve të Bashkuara për të kundërshtuar Presidentin Donald Trump, vetëm pak orë para zhvillimit të paradës ushtarake në Washington D.C.
Lëvizja, e quajtur "No Kings", organizoi një "ditë mbarëkombëtare sfidimi", si reagim ndaj politikave të mandatit të dytë të Trump, të cilat organizatorët i konsiderojnë si shkelje të hapura të normave kushtetuese dhe përqendrim të rrezikshëm të pushtetit.
Protesta të mëdha u mbajtën në New York, Philadelphia dhe Houston, ku figura publike si ligjvënës, drejtues sindikatash dhe aktivistë i drejtoheshin turmave me flamuj amerikanë dhe pankarta anti-Trump.
Ndërkohë, parada ushtarake e planifikuar për mbrëmjen e së shtunës, e organizuar në nder të 250-vjetorit të Ushtrisë Amerikane dhe që përkon me ditëlindjen e Presidentit Trump, është kritikuar nga disa politikanë dhe ish-zyrtarë ushtarakë si një politizim i rrezikshëm i forcave të armatosura.
Trump paralajmëroi më herët se protestuesit që do të përpiqen të ndërhyjnë në paradë, do të “përballen me forcë të madhe”.
Në Los Angeles, ku qyteti ndodhet në gjendje tensioni pas protestave për shkak të bastisjeve të imigracionit dhe vendimit të Trump për të federalizuar Gardën Kombëtare, autoritetet kanë forcuar masat e sigurisë. Kjo ndodhi kundër vullnetit të Guvernatorit Gavin Newsom, duke shtuar përplasjet mes qeverisjes federale dhe asaj shtetërore.
Kryetarja e Bashkisë së Los Angelesit, Karen Bass, deklaroi:
“Ajo që po ndodh në mbarë vendin, jo vetëm në qytetin tonë, ka shtuar edhe më tej shqetësimin për përshkallëzim të situatës.”
Grupi "No Kings", që i referohet paralajmërimeve kundër një presidencializimi autoritar të stilit monarkik, ka kritikuar qindra urdhra ekzekutivë, shkarkime masive të nëpunësve civilë dhe deportime të papritura si shenja të tejkalimit të pushtetit nga Presidenti Trump.
Ndërkohë, protestat në Minnesota janë anuluar, pasi të shtunën ndodhi një sulm i rëndë ndaj dy ligjvënësve shtetërorë – ku njëri mbeti i vrarë dhe tjetri i plagosur. Autoritetet janë në kërkim të autorit, ndërsa hetimet vijojnë.
