TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Mësuesja e Pratos, Itali që pati një fëmijë në vitin 2018 me një nxënës të saj, atëherë 15-vjeçar, është liruar nga burgu dhe i është dhënë prova në shërbime sociale. Gruaja jepte mësime private anglishte për të miturin, i cili po përgatitej për klasën e tretë të mesme. 34-vjeçarja ishte dënuar në vitin 2023 me gjashtë vite e pesë muaj për akte seksuale dhe dhunë seksuale për nxitje ndaj të miturit dhe ishte e burgosur në burgun e Sollicciano. Vendimi u mor nga Gjykata e Mbikëqyrjes në Firence, e cila vlerësoi se ekzistonin kushtet për një masë alternative ndaj burgimit.
Mësuesja do të mund të përfitojë një bursë pune tre-mujore pranë një shoqate, pas së cilës do të punësohet me kohë të pjesshme si operatore socio-sanitare nga një kooperativë: do të ofrojë kujdes në shtëpi për pacientët në nevojë, nën mbikëqyrjen e shërbimeve territoriale. Masa e provës shoqërohet me mbikëqyrjen e Zyrës për ekzekutimin penal jashtë burgut, e cila do ta ndihmojë në procesin e riintegrimit.
Ky vendim vjen pasi, në një vlerësim të parë në shkurt 2025, kërkesa për provë ishte refuzuar: atëherë, gjykata kishte vënë re tek gruaja një tendencë për të minimizuar përgjegjësitë e saj. Tani, sipas gjyqtarit, mësuesja duket e aftë të përballet me një rishikim kritik të ngjarjeve jashtë ambientit të burgut, një element kyç për rehabilitimin e saj.
“Jemi të kënaqur me vendimin e Gjykatës – thanë avokatët e saj – E mbrojtura jonë ka respektuar të gjitha hapat e kërkuar dhe ka ndjekur një proces gjyqësor dhe rehabilitues kompleks. Tani është gati të riintegrohet në shoqëri dhe të rindërtojë marrëdhënien me djalin e saj”. Me fillimin e periudhës së provës, gruaja do të nisë një proces riintegrimi social që mund, nëse respektohet sipas kushteve, të përfundojë me shlyerjen e dënimit.
Ngjarjet ndodhin midis vitit 2017, kur djali ishte vetëm 13 vjeç dhe fillimit të vitit 2019. Gjykata e Lartë e konfirmoi dënimin në vitin 2023, duke e bërë atë përfundimtar. Rasti kishte tërhequr shumë vëmendje mediatike dhe kishte ndezur debat publik.
