TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Më pak familje shqiptare kanë hua për të shlyer, por për ato që kanë marrë kredi, pesha e kësteve mbi të ardhurat është rritur. Të dhënat e Bankës së Shqipërisë nga vrojtimi “Mbi gjendjen financiare dhe ngarkesën me borxh të familjeve”, për gjashtëmujorin e parë të vitit 2026, tregojnë se rreth 16% e familjeve të anketuara kanë të paktën një hua për të paguar. Kjo peshë është ulur lehtë krahasuar me gjashtëmujorin e kaluar dhe me të njëjtën periudhë të një viti më parë, duke qëndruar edhe nën mesataren historike prej 26%.
Megjithatë, për familjet që kanë kredi, situata është disi më e ndryshme. Rreth 76% e familjeve huamarrëse deklarojnë se pagesa e huasë zë më pak se 30% të të ardhurave të tyre mujore. Por kjo peshë ka rënë krahasuar me periudhën e mëparshme, ndërsa është rritur numri i familjeve për të cilat kësti i kredisë përbën më shumë se 30% të të ardhurave.
Kjo tregon se, ndonëse numri i familjeve që kanë hua është ulur, për një pjesë të tyre shlyerja e kredive po zë një pjesë më të madhe të të ardhurave. Edhe vetë familjet raportojnë një dobësim të lehtë të aftësisë së tyre për të përballuar pagesat. Rreth 51% e familjeve huamarrëse thonë se aftësia paguese nuk ka ndryshuar gjatë gjysmës së parë të vitit. Ndërkohë, 70% e tyre nuk presin ndryshime në këtë drejtim gjatë gjysmës së dytë të vitit.
Sipas Bankës së Shqipërisë, treguesit e aftësisë paguese dëshmojnë për një dobësim gjatë gjashtëmujorit të parë. Megjithatë, pritjet për pjesën e dytë të vitit janë më të qëndrueshme dhe më optimiste. Pra, edhe pse një pjesë e familjeve po përballen me një ngarkesë disi më të lartë nga huatë, shumica nuk presin përkeqësim të mëtejshëm të aftësisë së tyre paguese. Sa i takon kërkesës për kredi, familjet presin që ajo të mbetet e qëndrueshme gjatë pjesës së dytë të vitit 2026.
