TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Projektligji i ri për “Kontrollin e kultivimit dhe përpunimit të bimës kanabis dhe prodhimit të nënprodukteve të saj, për qëllime mjekësore dhe industriale” i propozuar nga Ministria e Shëndetësisë dhe Mbrojtjes Sociale, Ministria e Bujqësisë dhe Zhvillimit Rural dhe Ministria e Brendshme, pas nismës së Këshillimit Kombëtar, do të lejojë përdorimin për eksport të bimës së kanabisit për përdorim mjekësor dhe industrial.
Për të kontrolluar mbarëvajtjen e këtij procesi do të ngrihet edhe një agjenci e posaçme në nivel kombëtar. Agjencia e Kontrollit të Kanabisit do të jetë një agjenci buxhetore që do të ketë për mision mbikëqyrjen, kontrollin e përpunimin e bimës së kanabisit dhe prodhimit të nënprodukteve të saj, për qëllime mjekësore dhe industriale.
Ajo do të organizojë procedurat për dhënien e licencave, sipas rregullave të përcaktuara në këtë ligj, do të mbikëqyrë veprimtarinë e subjekteve të licencuara; do të bashkëveprojë me të gjitha organet kompetente me qëllim realizimin e objektivave dhe detyrimeve që rrjedhin nga marrëveshjet ndërkombëtare, do të bashkëpunojë me Qendrën Europiane për Monitorimin e Drograve dhe Varësisë dhe Bordin Ndërkombëtar të Kontrollit të Narkotikëve.
Kjo agjenci do të ketë në përgjegjësinë e saj administrimin e regjistrit të të dhënave në nivel kombëtar. Ajo do të ketë në funksion e saj edhe ngritjen e Komisionit të Licencave për Shqyrtimin dhe Vlerësimin e Kërkesave të paraqitura për marrjen e licencës për kultivimin e kanabisit, si dhe lëshimi i autorizimeve për eksportin e kanabisit industrial dhe nënprodukteve.
