AKTUALITET, 24 Shtator 2023, 21:20

Gazment Bardhi: T’i jepet fund lojës me bashkëpërgjegjësi të agresorëve dhe viktimave, Rama të heqë dorë nga roli neutral mbi situatën në Kosovë

Gazment Bardhi: T’i jepet fund lojës me

Kreu i Grupit Parlamentar të Partisë Demokratike, Gazment Bardhi, ka reaguar pas sulmit të kriminelëve serbë në veri të Kosovës, ku mbeti viktimë një efektiv i Policisë dhe një tjetër i plagosur.

Përmes një Postimi, Bardhi shprehet se ka ardhur koha t’i jepet fund lojës me bashkëpërgjegjësi të agresorëve dhe viktimave.

Ai shtoi se pas sulmeve terroriste serbe, kryeministri dhe institucionet shqiptare të heqin dorë nga roli neutral mbi situatën në Veri të Kosovës.

Reagimi i Bardhit:

Grupi Parlamentar i Partisë Demokratike ka ndjekur gjatë gjithë ditës me shumë shqetësim situatën e krijuar në veri të Kosovës. Sulmet e vazhdueshme terroriste kundër forcave të sigurisë së Kosovës, që kulmuan sot me vrasjen e një punonjësi të Policisë së Kosovës në krye të detyrës, bëjnë të domosdoshme që ti jepet fund lojës me bashkëpërgjegjësi të agresorëve dhe viktimave. Bashkëpërgjegjësia midis agresorit dhe viktimës nxit terroristët të përgatisin dhe kryejnë sulme të tilla kriminale në territorin e Kosovës. Përgjegjësia për situatën është vetëm e agresorit dhe atyre që vazhdimisht provokojnë me akte të papranueshme një shtet sovran.

Kosova e lirë dhe e pavarur është një realitet i pakthyeshëm. Serbia duhet ta pranojë këtë realitet dhe duhet të heq dorë nga çdo provokim kriminal në veri të Kosovës, duke u ulur në tryezën e dialogut pa kushte, me ndërmjetësimin e SHBA-BE.

Duke i shprehur ngushëllimet e sinqerta familjes së heroit Afrim Bunjaku, gjejmë rastin të dënojmë me forcë sulmin dhe të shprehim mbështetjen e plotë për Policinë dhe institucionet shtetërore të Kosovës, për ruajtjen e integritetit të tyre territorial dhe funksionimin e shtetit ligjor në çdo pjesë të territorit të Kosovës. Ne mbështesim të gjitha veprimet ligjore për vënien para përgjegjësisë së autorëve të sulmin dhe dënimin e tyre sipas ligjeve në fuqi.

Gjithashtu, gjejmë rastin të kërkojmë nga institucionet e shtetit shqiptar, përfshirë Kryeministrin e Republikës së Shqipërisë, që të heqin dorë nga deklaratat, sjellja dhe roli i tyre neutral mbi situatën në veri të Kosovës. Kryeministri i Shqipërisë dhe të gjitha institucionet përgjegjëse të shtetit shqiptar duhet të përmbushin detyrimet e tyre kushtetuese, duke qenë plotësisht vetëm në mbështetje të institucioneve të Kosovës dhe popullit të Kosovës, në bashkërendim të plotë edhe me partnerët strategjik të Kosovës e Shqipërisë.