AKTUALITET, 24 Shtator 2023, 19:42

Mbyllet procesi i votimit në zgjedhjet për kryetarin e Bashkisë së Kukësit, pritet të nisë procesi i numërimit

Mbyllet procesi i votimit në zgjedhjet për kryetarin e Bashkisë

Është mbyllur procesi i votimit në Bashkinë e Kukësit, në zgjedhjet e parakohshme për kryebashkiakun e ri.

Zgjedhjet e sotme vijnë pas videskandalit seksual në zyrën e ish-kryebashkiakut socialist, Safet Gjicit, i cili u kap duke kryer marrëdhënie intime.

Procesi u zhvillua në 74 Qendra Votimi, një prej të cilave në institucionin e paraburgimit në Kukës.

Mësohet se pjesëmarrja në zgjedhje ka qenë rreth 44 %.

Në këto zgjedhje të pjesshme kishte një fletë votimi, në të cilën numrin 1 e mban kandidati socialist Albert Halilaj, ndërsa i dyti renditet Emri Vata, që përfaqëson koalicionin “Bashkë Fitojmë”.

Ndërkohë pritet që të nisë procesi i numërimit të votave, ku do të përcaktohet se kush do të jetë drejtuesi i ri i Bashkisë së Kukësit.