AKTUALITET, 24 Shtator 2023, 20:33

Vrasja e policit shqiptar, Vuçiç sillet si viktimë dhe akuzon Kurtin: Ai dëshiron të na fusë në luftën me NATO-n

Vrasja e policit shqiptar, Vuçiç sillet si viktimë dhe akuzon

Presidenti i Serbisë, Aleksandar Vuçiq, në fjalimin e tij për publikun lidhur me ngjarjet e fundit në Kosovë, tha se kryengritësit serbë nga Kosova të cilët “u rebeluan kundër terrorit të Kurtit” morën pjesë në konfliktin afër Banjkës.

Vuçiq tha se kjo është një nga ditët më të vështira “për vendin dhe popullin tonë që nga viti 2004 dhe 2008”.

“Duhet të shqyrtojmë gjithçka vetë, në mënyrë që të shpallim të vërtetën dhe të përgatisim terrenin për vendimmarrje”, tha Vuçiq.

“Rreth orës 2:46 sonte një grup serbësh nga Kosova kanë vendosur 2 kamionë si barrikada në Banjskë në veri të Kosovës, pastaj ka ardhur policia e Kosovës dhe ka tentuar t’i largojë ato barrikada dhe ka pasur një konflikt dhe në atë u vra polici i konfliktit A.B. dhe një person tjetër është plagosur”, tha Vuçiq.

Presidenti i Serbisë, edhe kësaj radhe, ka përdorur aftësitë e tij të propagandës serbe duke u munduar të arsyetojë sulmuesit.

Megjithatë, ai në një moment është treguar “i ndjeshëm”, duke u thënë se i vjen keq për policin e vrarë shqiptar.

“Kjo është një nga ditët më të vështira për vendin tonë, ju kërkoj falje qytetarëve që nuk fola më herët, siç e dini që nga viti 1999 nuk kemi pasur kontroll të drejtpërdrejtë dhe është dashur të hetojmë se çfarë ka ndodhur që të mund t’i tregojmë njerëzve të vërtetën dhe përgatisim terrenin për vendimmarrje”, ka thënë fillimisht presidenti serb, përcjell Telegrafi.

Pas kësaj ai ka filluar të shpalos kronologjinë e ngjarjeve, sipas versionit të tij, sipas të cilit rreth orës 2h 46m, një grup serbësh vendosën dy kamionë si barrikada në Banjska në veri të Kosovës, pastaj vjen policia e Kosovës duke tentuar t’i heq ato barrikada dhe pastaj vijnë deri në konflikt – nga ku mbeti i vrarë polici Afrim Bunjaku dhe një person tjetër u plagos. Në ora 08:57 u mbyllën vendkalimet administrative Jarinje dhe Bërnjak, dhe pastaj vazhduan përleshjet. Në orën 10:15 shqiptarët njoftuan se katër komuna serbe ishin zonë e një operacioni antiterrorist”.

Dhe pas kësaj, ai ka filluar të luajë rolin e viktimës.

“Edhe pse kemi folur shumë herë për këtë, edhe pse unë kam paralajmëruar si në Bruksel ashtu edhe në Nju Jork që kjo mund të ndodhë, pak njerëz e dëgjuan”, ka thënë më tej Vuçiq, duke fajësuar edhe kësaj radhe, kryeministrin e Kosovës, Albin Kurtin.

“Albin Kurti është fajtori i vetëm. Albin Kurti është që dëshiron konflikt dhe luftë. Ai dëshiron të na fusë në luftën me NATO-n”, ka thënë ndër tjerash Vuçiq, përcjell Telegrafi.

Deklaratat e tij vijnë pasi që Njësia Speciale e Policisë së Kosovës, është futur brenda Manastirit të Banjskës, ku ndodheshin grupi kriminal serb i armatosur së bashku me dhjetëra pelegrinë.

Pas kësaj, siç ishte bërë e ditur më herët, ata kanë shoqëruar në stacionin e policisë në jug të Mitrovicës 49 pelegrinë.

Ndërkohë ishte raportuar se është gjetur sasi e madhe e armatimit brenda manastirit, e po ashtu brenda automjeteve që gjendeshin pranë manastirit.

Kryeministri i Kosovës, Albin Kurti kishte thënë se sulmi u krye nga banda kriminale e terroriste të Serbisë.

Ndërsa Prokuroria Speciale e Kosovës deklaroi se rasti po trajtohet si sulm ndaj rendit kushtetues, ku hynë edhe terrorizmi.

Ndryshe, Policia e Kosovës është sulmuar me arsenal armësh, përfshirë këtu edhe me granata dore, ku si pasojë e gjuajtjeve një polic është vrarë dhe një tjetër është plagosur.

Veç kësaj, Policia e Kosovës ka bërë të ditur se ka shkuar në tre numri i sulmuesve të vrarë në veri të Kosovës.