TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shqipëria, Greqia dhe Maqedonia e Veriut kanë nisur punën për përgatitjen e një kandidature të përbashkët, me synimin që rajoni i Prespës të përfshihet në Listën e Trashëgimisë Botërore të UNESCO-s.
Ministri shqiptar i Turizmit, Kulturës dhe Sportit, Blendi Gonxhja, është takuar sot në Prespë me homologen greke, Lina Mendoni, ministre e Kulturës, dhe Sedat Sulejmanin, ministrin e Kulturës dhe Turizmit të Maqedonisë së Veriut. Lajmin e ka bërë të ditur vetë Gonxhja përmes një postimi në rrjetet sociale.
Bashkimi Europian do të vërë në dispozicion 2 milionë euro për hartimin e studimit të fizibilitetit, i cili do të shërbejë si bazë për përgatitjen e kandidaturës trepalëshe.
Nisma synon të bashkojë përpjekjet e tri vendeve për mbrojtjen dhe promovimin e vlerave të Prespës, një rajon i pasur me trashëgimi natyrore, historike dhe kulturore.
Gonxhja: Prespa na bashkon përmes natyrës, historisë dhe kulturës
Përmes një postimi në rrjetet sociale, ministri Blendi Gonxhja ka bërë të ditur se takimi në Prespë shënon nisjen e një procesi të përbashkët mes tri vendeve për përgatitjen e kandidaturës drejt UNESCO-s.
“Jemi sot në bashkinë e Prespës në Greqi, së bashku me homologët Mendoni nga Greqia, Ministre e Kulturës dhe Sulejmani nga Maqedonia e Veriut, Ministër i Kulturës dhe Turizmit, për të nisur një proces të përbashkët: përgatitjen e kandidaturës së këtij rajoni për përfshirjen në Listën e Trashëgimisë Botërore të UNESCO-s.
Prespa na bashkon përmes natyrës, historisë dhe kulturës së saj. Duam ta mbrojmë këtë pasuri dhe të krijojmë më shumë mundësi për komunitetet që jetojnë këtu dhe më shumë turizëm të qendrueshëm. Bashkimi Europian do të vërë në dispozicion 2 milionë euro për hartimin e studimit të fizibilitetit për këtë kandidaturë trishtetërore.
Në pjesën shqiptare, restaurimi i pikturave murale në Kishën e Shën Marisë në Maligrad, ndriçimi i kishës dhe i shtegut, si edhe Shtëpia Muze e Sterjo Spasses në Gollomboç, kanë pasuruar ofertën kulturore dhe turistike të zonës.
Po kështu, projekti ACT4PRESPA, i financuar nga BE, bashkon institucione nga të tre vendet për konservimin, digjitalizimin dhe promovimin e vlerave të papërsëritshme të trashëgimisë së Prespës së Madhe e të Vogël. Duam gjithashtu të zhvillojmë itinerare të përbashkëta turistike, misione kërkimore e ekspedita për njohjen dhe promovimin e Prespës dhe Ohrit, krahas shkëmbimeve artistike, sportive dhe rinore me fqinjët tanë”, shkruan Gonxhja.
ACT4PRESPA, bashkëpunim për ruajtjen e trashëgimisë
Një rol të rëndësishëm në këtë nismë ka edhe projekti i përbashkët ACT4PRESPA, i financuar nga Bashkimi Europian, i cili bashkon institucionet e tri vendeve për konservimin, digjitalizimin dhe promovimin e trashëgimisë së Prespës së Madhe dhe Prespës së Vogël.
Në fokus janë gjithashtu zhvillimi i itinerareve të përbashkëta turistike, organizimi i ekspeditave dhe misioneve kërkimore për njohjen e Prespës dhe Ohrit, si dhe nxitja e shkëmbimeve artistike, sportive dhe rinore mes komuniteteve të tri vendeve.
Në pjesën shqiptare të Prespës, restaurimi i pikturave murale në Kishën e Shën Marisë në Maligrad, ndriçimi i kishës dhe i shtegut përreth, si dhe Shtëpia Muze e Sterjo Spasses në Gollomboç, janë ndër investimet që kanë kontribuar në pasurimin e ofertës kulturore dhe turistike të zonës.
Çfarë do të thotë kandidatura për Prespën?
Përfshirja e Prespës në Listën e Trashëgimisë Botërore të UNESCO-s synon të rrisë vëmendjen ndërkombëtare ndaj vlerave të saj natyrore dhe kulturore, të forcojë mbrojtjen e trashëgimisë dhe të krijojë mundësi të reja për zhvillimin e komuniteteve lokale.
Nisma parashikon gjithashtu nxitjen e turizmit të qëndrueshëm dhe krijimin e ofertave të përbashkëta turistike përtej kufijve shtetërorë.
Për momentin, procesi është në fazën e përgatitjes së kandidaturës dhe të studimit të fizibilitetit. Përfshirja në listën e UNESCO-s do të varet nga përgatitja e dosjes dhe vlerësimi sipas kritereve përkatëse të organizatës.
