TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjykata Kushtetuese ka pranuar pjesërisht kërkesën e kreut të Partisë Demokratike, Sali Berisha lidhur shfuqizimin e masës së sigurisë “detyrim për paraqitje”.
Gjykata vlerësoi se Gjykata e Lartë nuk u kishte dhënë përgjigje pretendimeve që lidhen me nevojën dhe përshtatshmërinë e kësaj mase sigurimi.
Për këtë arsye, çështja do të rikthehet në Gjykatën e Lartë, e cila duhet të shqyrtojë sërish problematikat e evidentuara nga Gjykata Kushtetuese.
Vendimi i Gjykatës Kushtetuese nuk e heq automatikisht masën e sigurisë ndaj Sali Berishës. Ai shfuqizon vendimin e Gjykatës së Lartë dhe e kthen çështjen për rishqyrtim.
Për rrjedhojë, Gjykata e Lartë duhet të shqyrtojë sërish çështjen, duke marrë parasysh vërejtjet e Gjykatës Kushtetuese mbi arsyetimin e nevojës dhe përshtatshmërisë së masës.
NJOFTIM VENDIMMARRJEJE
Gjykata Kushtetuese e Republikës së Shqipërisë (Gjykata), në datën 08.10.2026, mori në shqyrtim në seancë plenare mbi bazë të dokumenteve çështjen me kërkues Sali Berisha, me objekt: “Shfuqizimi i vendimeve nr. 1 (87-2025-1), datë 03.01.2025 të Gjykatës së Posaçme të Apelit për Korrupsionin dhe Krimin e Organizuar dhe nr. 00-2025-658, datë 22.04.2025 të Kolegjit Penal të Gjykatës së Lartë, si të papajtueshme me Kushtetutën e Republikës së Shqipërisë”.
Gjykata, e mbledhur sot në datën 09.10.2026, pasi mori në shqyrtim pretendimet dhe prapësimet e palëve, në mënyrë të përmbledhur, vlerësoi:
– Të shqyrtojë çështjen në drejtim të lirisë së lëvizjes të lidhur me të drejtën e aksesit dhe standardin e arsyetimit të vendimit. Në përfundim të shqyrtimit, Gjykata çmoi se masa e sigurimit “Detyrimi për t’u paraqitur në Policinë Gjyqësore” ndërhyn në lirinë e lëvizjes të garantuar nga neni 38 i Kushtetutës dhe, për rrjedhojë, duke u bazuar në arsyetimin e gjykatave, konstatoi se Gjykata e Lartë nuk i ka dhënë përgjigje pretendimeve për nevojën dhe përshtatshmërinë e masës;
– Se pretendimet e tjera për cenimin e së drejtës për proces të rregullt ligjor kanë marrë përgjigje nga gjykatat e juridiksionit të zakonshëm, arsyetimi i të cilave nuk u gjet arbitrar dhe i pamjaftueshëm në aspektin kushtetues.
Në përfundim të shqyrtimit të kësaj çështjeje, Gjykata, me shumicë votash, vendosi:
Pranimin pjesërisht të kërkesës.
Shfuqizimin e vendimit nr. 00-2025-658, datë 22.04.2025 të Kolegjit Penal të Gjykatës së Lartë, si të papajtueshëm me Kushtetutën e Republikës së Shqipërisë.
Dërgimin e çështjes për shqyrtim në Gjykatën e Lartë.
Shpenzimet e përfaqësimit për kërkuesin në vlerën 60.000 lekë i ngarkohen Ministrisë së Financave.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për Procedurat Gjyqësore të Gjykatës Kushtetuese.
