TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Banorët e Memaliajt kanë dalë sërish në protestë kundër projektit të ri të ndarjes territoriale, i cili parashikon bashkimin e Bashkisë së Memaliajt me Bashkinë e Tepelenës.
Kjo është protesta e dytë radhazi e organizuar nga qytetarët, të cilët kundërshtojnë ndryshimet e propozuara dhe kërkojnë që Memaliaj të ruajë statusin e tij si njësi vendore më vete.
Protestuesit shprehen se bashkimi me Tepelenën do të ndikojë negativisht në përfaqësimin dhe zhvillimin e zonës, ndërsa i bëjnë thirrje qeverisë që të rishqyrtojë projektin e ndarjes territoriale.
Banorët kanë paralajmëruar se do të vijojnë protestat edhe në ditët në vijim, nëse kërkesat e tyre nuk do të merren në konsideratë.
Ndërkohë, edhe qytetarët e Rrogozhinës janë mbledhur në Parkun e Qytetit për të protestuar kundër ndryshimeve të propozuara në ndarjen territoriale, duke kundërshtuar mundësinë që Bashkia e Rrogozhinës t’i bashkohet Bashkisë së Kavajës.
Me pankarta në duar dhe thirrjen “Rrogozhina është e jona”, protestuesit shprehën pakënaqësinë e tyre ndaj projektit, duke kërkuar që bashkia të ruajë statusin dhe identitetin e saj administrativ.
Gjatë protestës, qytetarët u kanë bërë thirrje përfaqësuesve të qeverisë që të vizitojnë Rrogozhinën dhe të dëgjojnë nga afër shqetësimet e banorëve.
Sipas protestuesve, Bashkia e Kavajës përballet me problematika të shumta dhe nuk mund të përballojë njëkohësisht edhe nevojat e Rrogozhinës.
Ata kërkojnë anulimin e projektligjit për ndarjen territoriale, duke theksuar se Rrogozhina duhet të mbetet një bashki më vete, me përfaqësimin dhe administrimin e saj.
Qytetarët kanë paralajmëruar se protestat do të vijojnë edhe nëse kërkesat e tyre nuk merren parasysh nga autoritetet.
