TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Inez Hajrulla, person i shpallur në kërkim nga SPAK, dyshohet se mund të jetë rrëmbyer nga persona të lidhur me një grup kundërshtar, ndërsa autoritetet po verifikojnë informacionet mbi fatin e tij.
Sipas të dhënave paraprake, Hajrulla dyshohet se ndodhej në një hotel së bashku me një vajzë që përflitet se i përket showbiz-it, në momentin kur kontaktet me ta u ndërprenë.
Ndërkohë, po mblidhen pamje nga kamerat e sigurisë, me qëllim rindërtimin e lëvizjeve të tyre dhe sqarimin e rrethanave të ngjarjes.
Dyshimet e para lidhen me persona të një grupi kundërshtar me të cilin Hajrulla ka pasur konflikte të mëparshme.
Megjithatë, informacioni mbetet në fazën e verifikimit dhe nuk është konfirmuar zyrtarisht nga Policia e Shtetit deri në publikimin e këtij raportimi. Gjithashtu, nuk dihet nëse policia ka regjistruar zyrtarisht një denoncim për zhdukjen e tij apo nëse janë nisur kërkimet në lidhje me këtë informacion.
Hajrulla është një emër i njohur për autoritetet në Vlorë dhe aktualisht është në kërkim pas një operacioni të SPAK kundër një grupi kriminal, ku ndaj tij janë ngritur dyshime për përfshirje në veprimtari kriminale.
Në mars të vitit 2026, SPAK zhvilloi një operacion në Vlorë, gjatë të cilit u lëshuan masa arresti për disa persona, mes tyre edhe Hajrullën, i cili nuk u kap.
Nga “Ini i Çones” te “El Padrino” i Vlorës pas vrasjes së Edison Faqedjegurit
Kur emra të rëndësishëm të botës së krimit bien, të tjerë ngrihen në vendin e tyre.
Vëmendja shpesh përqendrohet te personat që zënë pozicionet e atyre që janë vrarë ose arrestuar. Ndonëse mund të krijohet përshtypja se largimi i figurave të njohura të krimit do të ngadalësojë aktivitetin kriminal, në shumë raste ai merr forma më të sofistikuara dhe mund të bëhet edhe më i dhunshëm.
Bota e re e nëndheshme, që në pamje të parë duket më e qetë dhe më e decentralizuar, organizohet në mënyrë të tillë që aktiviteti të mos ndalet kur një prej personave kryesorë largohet nga skena.
E njëjta gjë duket se ka ndodhur edhe në Vlorë. Një qytet që për vite me radhë është përballur me nivele të larta kriminaliteti, vitet e fundit mund të duket më i qetë. Ndërsa policia ka goditur disa prej figurave më të ekspozuara dhe të tjerë janë vrarë, persona më pak të dukshëm kanë marrë pozicione të rëndësishme.
Në aktivitetin e sotëm të trafikut të drogës, pushteti nuk shfaqet domosdoshmërisht hapur, por ushtrohet në prapaskenë, përmes kompanive fiktive, takimeve të mbyllura dhe komunikimeve të koduara.
Figurat e reja të botës së krimit duket se synojnë të shmangin ekspozimin publik. Ndryshe nga personazhet që shfaqnin hapur jetën e tyre luksoze, brezi i ri kërkon më pak famë dhe më shumë kontroll.
Në Dubai, sipas dyshimeve të ngritura ndër vite për personazhe të botës së krimit, para të përfituara nga veprimtari të paligjshme mund të investohen në luks dhe aktivitete që synojnë t'u japin atyre pamjen e ligjshmërisë.
Kur interesat përplasen ose konkurrenca në Shqipëri kërcënon pozitat e grupeve, dyshohet se vendimmarrja mund të bëhet nga jashtë vendit, ndërsa zbatimi u lihet personave të tjerë, pa u ekspozuar drejtpërdrejt organizatorët e mundshëm.
Në këtë mënyrë, mund të krijohen struktura kriminale që veprojnë pa një identitet të dukshëm publik, duke përdorur edhe mekanizma ligjorë për të maskuar pasuritë e paligjshme.
Atentatet ndaj Inez Hajrullës dhe lidhja me Edison Harizajn
Një zhvillim i tillë dyshohet se mund të ketë ndodhur edhe në Vlorë, veçanërisht pas atentateve të përsëritura ndaj Inez Hajrullës, i cili arriti t'u mbijetonte disa sulmeve.
Hajrulla kishte lidhje shoqërore me Edison Harizajn, të njohur edhe si “Edison Faqedjeguri”, i konsideruar si një prej personazheve më të fuqishëm të botës së krimit në Vlorë.
Harizaj u ekzekutua në Durrës në nëntor të vitit 2018. Ai konsiderohej një person i ekspozuar ndaj rrezikut për shkak të konflikteve të shumta që lidhen me trafikun e drogës, vrasjet dhe gjobëvëniet.
Përveç të tjerave, Harizaj kishte një aleancë me grupin e Selenicës, konkretisht me Ferdinand Llanajn. Ai njihej gjithashtu për miqësinë me Emiljano Shullazin.
Edison Harizaj dhe shoku i tij, Genci Çaçi, u qëlluan me më shumë se 50 plumba teksa udhëtonin drejt Kavajës me një automjet “Audi A8”.
Pas vrasjes së Harizajt, dyshimet u përqendruan edhe te mundësia që Hajrulla, i konsideruar si një nga njerëzit e tij më të afërt, të ishte përfshirë në zhvillimet e mëvonshme mes grupeve rivale dhe në përpjekjet për hakmarrje.
Gjithashtu, ndaj tij janë ngritur dyshime për përfshirje në aktivitetin kriminal që i atribuohej Harizajt, edhe pas ekzekutimit të këtij të fundit.
Atentati i parë i njohur ndaj Hajrullës ndodhi më 27 nëntor 2017, në rrugën “Sulejman Delvina”, në Vlorë. Atëherë, ndaj tij u tentua një sulm me eksploziv, të vendosur në automjetin “Jeep” me të cilin udhëtonte.
Nga shpërthimi, Hajrulla mbeti i plagosur rëndë. Gjatë kontrollit të automjetit, policia gjeti edhe një pistoletë që ai e mbante pa leje.
Atentati i vitit 2019 dhe dyshimet për një vrasje me pagesë
Dy vite më vonë, në maj të vitit 2019, Hajrulla u bë sërish objekt i një atentati me armë zjarri në zonën e “Ujit të Ftohtë”, në Vlorë, teksa ishte ulur në një lokal.
Autorët e qëlluan nga një automjet në lëvizje. Hajrulla arriti t'i mbijetonte edhe këtij sulmi, ndërsa gjatë të shtënave mbeti i plagosur gabimisht edhe një person tjetër që po pinte kafe në të njëjtin lokal.
Automjeti i përdorur nga atentatorët u gjet më vonë i djegur në fshatin Babicë e Vogël.
Në atë kohë, policia dyshonte se ngjarja mund të ishte porositur nga Bernard Sinomataj, për shkak të përplasjeve që dyshohej se ekzistonin mes tyre.
Megjithatë, në gusht të vitit 2023, Policia e Vlorës arrestoi Amarildo Nikollin, nga Shkodra, për të cilin u ngritën dyshime se ishte paguar për të vrarë Inez Hajrullën.
Nikolli u arrestua teksa qarkullonte me armë zjarri me silenciator dhe fishek në fole, gati për qitje. Ai dyshohej se kishte ardhur nga Italia në Shqipëri për të kryer një vrasje me pagesë.
Fillimisht, çështja ndaj tij u trajtua nga Gjykata e Vlorës për akuzën e “Mbajtjes pa lejë të armëve dhe municionit”. Pas disa muajsh hetime, Prokuroria e Vlorës shpalli moskompetencën dhe dosja iu kalua Prokurorisë së Posaçme (SPAK).
SPAK nisi hetimet për veprat penale të “Vrasjes me paramendim”, mbetur në tentativë dhe të kryer në formën e “Grupit të strukturuar kriminal”, si dhe për “Mbajtjen pa lejë të armëve të zjarrit”.
Dëshmia e Nikollit dhe pista që çon drejt Dubait
Amarildo Nikolli ka pranuar të bashkëpunojë me prokurorët e SPAK-ut, duke treguar, sipas dëshmisë së tij, emrat e disa personave të botës së krimit në Vlorë, Tiranë dhe Shkodër.
Ai dyshohet se ka dhënë informacione për personin që e kishte porositur për të kryer vrasjen, si dhe për personat që e kishin ndihmuar.
Megjithatë, sipas të dhënave të bëra publike, Nikolli nuk ka qenë në gjendje të tregojë se për llogari të kujt do të kryhej vrasja. Në këtë pikë të hetimeve, sipas raportimeve, del në skenë edhe pista e Dubait.
Emri i Inez Hajrullës është lidhur ndër vite me disa atentate të mbetura në tentativë ndaj tij, ndërsa përplasjet mes grupeve rivale në Vlorë kanë qenë objekt i hetimeve të ndryshme.
Për momentin, rrethanat e raportuara lidhur me zhdukjen e tij mbeten të paqarta. Dyshimet për një pengmarrje nuk janë konfirmuar zyrtarisht dhe mbetet për t'u parë nëse verifikimet e autoriteteve do të hedhin dritë mbi fatin e tij dhe personat që mund të jenë përfshirë.
