TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Studime të shumta shkencore kanë treguar se qëndrimi për periudha të gjata në ulje, me aktivitet minimal fizik, rrit rrezikun për hipertension dhe sëmundje të zemrës. Edhe pse rritja e aktivitetit fizik mbetet rekomandimi kryesor, ushtrimet nuk e eliminojnë plotësisht rrezikun kardiovaskular.
Një studim i publikuar në The Journal of Physiology zbuloi se vetëm 2 orë ulje e pandërprerë ndikuan negativisht në funksionin e enëve të gjakut tek meshkujt e rinj, pavarësisht nivelit të tyre të formës fizike. Këto rezultate janë veçanërisht shqetësuese, duke qenë se të rinjtë sot kalojnë mesatarisht 6 orë në ditë ulur, një rritje me 18% krahasuar me dy dekada më parë.
Kakaoja si faktor mbrojtës
Për të testuar ndikimin e ushqimit, studiuesit u dhanë pjesëmarrësve një pije kakaoje me përmbajtje të lartë flavanolesh ose një pije me nivele të ulëta të tyre. As pjesëmarrësit dhe as studiuesit nuk e dinin cilën pije merrte secili deri në fund të studimit.
Analiza e zgjerimit të arterieve brachiale dhe femorale tregoi se, pas dy orësh uljeje, funksioni vaskular u ul ndjeshëm në të dy grupet. Edhe një rënie prej 1% në aftësinë e zgjerimit të arterieve rrit rrezikun për sëmundje të zemrës me rreth 9% me kalimin e kohës.
Megjithatë, te pjesëmarrësit që konsumuan kakao me përmbajtje të lartë flavanolesh, funksioni i enëve të gjakut u ruajt ose madje u përmirësua lehtësisht gjatë periudhës së uljes.
Si veprojnë flavanolet?
Këto substanca veprojnë në nivel molekular duke:
rritur prodhimin e oksidit nitrik, i cili mban enët e gjakut elastike;
ulur nivelet e endotelinës-1, që shkakton ngushtimin e arterieve.
Dozat e përdorura në studim janë të krahasueshme me sasitë që gjenden në një filxhan kakaoje pa sheqer, çokollatë të zezë me përqindje të lartë kakaoje, çaj jeshil, boronica ose mollë.
Çfarë ndodh me presionin e gjakut?
Edhe pse kakaoja mbrojti funksionin e arterieve, nuk ndaloi rritjen e presionit diastolik. Pas dy orësh uljeje, presioni diastolik u rrit 2,4–5,8 mmHg në të gjitha grupet. Disa pjesëmarrës arritën nivele para-hipertensive, duke sugjeruar se një dozë e vetme flavanolesh nuk mjafton për të frenuar këtë efekt.
Çfarë përfitojmë në praktikë?
Studimi u krye vetëm tek meshkuj 18–45 vjeç dhe matjet zgjatën vetëm 2 orë, por mesazhi kryesor është i qartë: aktiviteti fizik nuk neutralizon plotësisht efektet e dëmshme të uljes së gjatë.
Kjo nuk nënkupton zëvendësimin e ushtrimeve me çokollatë. Megjithatë, kombinimi i lëvizjes së shpeshtë gjatë ditës me ushqime të pasura me flavanolesh mund të ndihmojë në mbrojtjen e enëve të gjakut kur aktiviteti fizik është i kufizuar.
