Komandohen drejtuesit e rinj të burgjeve, rikthehen Arjan Hasani dhe Petrit Koshaj

Pak orë pas furtunës mbi krerët e burgjeve në vend, ka nisur edhe komandimi i drejtuesve të rinj, të cilët do të mbajnë këtë detyrë derisa të shpallen fituesit që do t’i nënshtrohen konkurrimit.

Drejtori i Përgjithshëm i Burgjeve, Arben Çuko ka prezantuar në Burgun e Sigurisë së Lartë drejtorin e ri Arjan Hasani. Ky i fundit, një oficer karriere ka qënë më herët drejtor i Burgut të Fierit, por u shkarkua pasi një video qarkulloi në media sikur një i burgosur lante makinën e drejtorit Hasani.

Ministri i Drejtësisë, në atë kohë, Ylli Manjani kërkoi ndjesë për shkarkimin e Hasanit, duke thënë se kishte larguar nga detyra një nga drejtuesit më të aftë të sistemit të burgjeve. Largimi i Hasanajt nga burgu i Sigurisë së Lartë në Fier, ku ishin 700 të burgosur, i hapi rrugë LSI për të futur disa militantë nga radhët e saj.

Ndërkohë, në burgun e Drenovës, është vendosur përkohësisht, Petrit Koshaj, një tjetër oficer karriere, i cili mbante më përpara pozicionin e Drejtorit të Policisë së Burgjeve dhe u shkarkua me urdhër të ministrit të drejtësisë, Petrit Vasili.

Edhe ndaj Koshajt, u ngrit një kurth, nga Drejtori i SHKB-së së Burgjeve, në atë kohë Ramazan Topuzi. Ky i fundit e akuzoi Koshajn, se i kishte dhënë leje Emiljano Shullazit për të shkuar në Spitalin e Burgut. Por ky pretendim ishte i pavërtetë, pasi lejen e jepte vetëm drejtori i Burgut përkatës, dhe jo Drejtori i Policisë së Burgjeve. Ndërkohë disa gazetarë të sponsorizuar nga interesa të ndryshme, tentuan që të implikonin Koshajn në skandalin e tenderave të ushqimit, e cila sërish nuk ishte kompetencë e Drejtorit të Policisë së Burgjeve.

Ndërkohë të tjerë që kanë marrë “timonin” e burgjeve tani, janë pjesë e sistemit penitenciar, si shefa personeli në Drejtorinë e Përgjithshme të Burgjeve, apo shefa policie në burgje, si Agron Hysi apo Surja Malasi.

Komandimi i tyre do të zgjasë derisa të përfundojë dorëzimi i dosjeve të kandidatëve, që do të garojnë për burgjet, te një komision i posaçëm që pritet të ngrihet. Shkarkimin e 8 drejtorëve e njoftoi të shtunën ministrja e Drejtësisë, Etilda Gjonaj, e cila tha se të gjithë ata do të kallëzohen për shpërdorim detyre dhe korrupsion, ndërkohë që dy ish-drejtues burgu rezultojnë me precedentë penalë.