TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Partia opozitare Aleanca për Ardhmërinë e Kosovës ka kërkuar që të rishikohet buxheti i Kosovës dhe rritjen e pagave në sektorin publik.
Këto kërkesa janë temat kryesore të interpelancës në Kuvendin e Kosovës më 22 qershor ndaj ministrit të Financave, Punës dhe Transfereve, Hekuran Murati.
Besnik Tahiri, shef i grupit parlamentar të AAK-së ka kërkuar fillimin e menjëhershëm të procedurës për rishikimin e buxhetit për vitin 2023.
Arsyeja e rishikimit të menjëherë të buxhetit, sipas Tahirit, është siç tha, për shkak të dështimit të plotë të investimeve kapitale dhe ngritjes së koeficientit të pagës në sektorin publik.
“Menaxhimi i fondeve publike në këto dy vjetët e fundit nga Qeveria [e kryeministrit të Kosovës, Albin] Kurti, ishte i dobët, joprofesional, partiak e politik, e mbi të gjitha ishte i dëmshëm për vendin”, tha Tahiri.
Sipas tij, në vitin 2021 nga fondi i investimeve kapitale, të përcaktuara në buxhet në shumë prej 622 milionë eurosh, janë realizuar vetëm 419 milionë euro.
Ndërsa, për vitin 2022, sipas Tahirit, shuma për investime kapitale ka qenë 794 milionë euro, ndërsa janë realizuar vetëm 419 milionë euro.
“Me dinamikën që e kemi në këtë vit, mund të pritet që ekonomia të bie në një kolaps dhe dështim të plot. Për dy vjet qeverisje, Kosova dhe kjo qeveri nuk kanë arritur t’i shpenzojnë gjysmë miliard euro”, tha ai.
Aleanca për Ardhmërinë e Kosovës ka kërkuar që koeficienti i pagës me rishikim të buxhetit të bëhet nga 105 euro në 129 euro.
Në shkurt të këtij viti Kuvendi i Kosovës ka miratuar koeficientin e pagës.
Ministri i Ministrisë së Financave, Punës dhe Transfereve, Hekuran Murati, i cilësoi të pavërteta deklarimet e deputetit Tahiri.
“Sa i përket mbështetjes së ekonomisë u tha që ka pasur humbje dhe mosalokim të investime kapitale. Sa i përket investimeve kapitale normalisht që paguhen faturat për punët që janë kryer, për projektet që nuk janë kryer punët ne nuk mund të paguajmë fatura”, tha Murati.
Ai tha se gjithnjë duke qëndruar brenda kornizës ligjore për vitin e ardhshëm koeficienti i pagës do të rritet në 110 euro.
“E konsideroj të panevojshme një seancë të tillë që kërkon të ndryshohet diçka për të cilën ne kemi shkuar në maksimum sa i përket vitit aktual”, tha ministri Murati.
Seanca e Kuvendit të Kosovës është duke vazhduar.
