TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ministria e Mbrojtjes ka bërë me dije se gjatë 12 orëve të fundit janë raportuar 23 vatra zjarri në të gjithë vendin, ndërsa 8 prej tyre vijojnë të jenë aktive.
Për menaxhimin e situatës dhe përballimin e vatrave të zjarrit janë angazhuar 26 automjete zjarrfikëse, 310 forca operacionale, 103 efektivë të Forcave të Armatosura, 3 helikopterë dhe 2 avionë “Air Tractor”. Helikopterët dhe avionët “Air Tractor” e kanë ndërprerë operacionin gjatë mbrëmjes.
Ndërhyrjet vijojnë në Dajt, Priskë të Madhe, Drenie të Patosit, Krujë, malin e Nemërçkës dhe malin e Dhëmbelit. Sipas Ministrisë së Mbrojtjes, aktualisht nuk raportohet rrezik për zonat e banuara.
Një operacion i rëndësishëm po zhvillohet edhe në Gurë-Lurë të Dibrës, ku janë angazhuar forca zjarrfikëse, vullnetarë dhe dy helikopterë të Forcave të Armatosura, të cilët janë pozicionuar pranë banesave me qëllim mbrojtjen e komunitetit. Edhe helikopterët në këtë zonë e kanë ndërprerë operacionin gjatë mbrëmjes.
Ndërkohë, vatra në Vilëz të Kurbinit është shuar plotësisht.
Agjencia Kombëtare e Mbrojtjes Civile dhe strukturat vendore të Mbrojtjes Civile vijojnë koordinimin dhe ndërhyrjet në terren, deri në neutralizimin e plotë të të gjitha vatrave aktive.
