"Zhgënjyese"/ Ambasada e SHBA-ve: Klima aktuale e biznesit në Shqipëri pengon rritjen e investimeve të huaja

Ambasada Amerikane në Tiranë është shprehur e zhgënjyer, lidhur me klimën aktuale të biznesit në vendin tonë. Në një reagim të saj, në faqen zyrtare në rrjetet sociale, ambasada shprehet se, kjo klimë pengon investimet e huaja. SHBA kërkon që, qeveria shqiptare të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme. “Në situatën ku ndodhemi sot, rrethanat në lidhje me hapësirën Pa Taksë (Duty Free) në Aeroportin Ndërkombëtar të Tiranës tregojnë sfidat me të cilat përballen investuesit e huaj në Shqipëri. Është zhgënjyese që klima aktuale e biznesit pengon rritjen e investimeve të huaja. Shqipëria duhet të zbatojë rregulla të drejta dhe transparente në mënyrë të barabartë për të gjitha bizneset. Shpresojmë që qeveria e Shqipërisë të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme”, thuhet në njoftim.