TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Egnatia fitoi 0-1 me Tiranën në "Elbasan Arena" dhe mori trofeun e parë të Kupës së Shqipërisë. Pas 120 minutave lojë, vendosi penalltia e Jackson në të 114'. Për herë të parë në histori, Egnatia ia doli të sigurojë një trofe madhor, duke mbyllur një sezon fantastik pas pjesëmarrjes në Conference League.
Ndeshja nisi e kujdesshme për dy skuadrat, që nuk kërkuan të linin hapësira pas. Me disa raste sporadike, dueli do shënjohej në të 25 minutë, kur Elvi Berisha doli me karton të kuq te Tirana. Pas një ndërhyrje në kohë vonesë, kryesori Enea Jorgji nuk ngurroi t'i tregonte kartonin e kuq direkt sulmuesit anësor.
Pas këtij momenti, ishte Egnatia që mori frenat e lojës, por pjesa e parë u mbyll 0-0. Në 45 minutat e dyta Tirana kishte disa mundësi, me Hilën që pretendoi për 11 metërsh, por nuk u akordua nga VAR. Në të 62 minutë, Jackson tronditi shtyllën e Tiranës, me Likën që ishte i mposhtur. Në të 77, Dwamena shënoi te Egnatia, me VAR që anulloi golin për pozicion jashtë loje.
Me 90 minutat që u mbyllën 0-0, dueli shkoi në shtesë. Do duhej minuta e 114 që Jackson nga pika e bardhë të ndalte Likën pas dy tentativave. Ndërhyrja gabim e Hilës ishte deçizive në këtë përballje, me Egnatian që del me kokën lart nga ky duel. Nga ana tjetër, Tirana mbyll sezonin me zero tituj.
Episodet e ndeshjes:
120+3' Mbyllet 0-1 ndeshja në "Elbasan Arena". Egnatia fiton për herë të parë Kupën e Shqipërisë.
114' Tirana 0-1 Egnatia. Ardit Hila ndërhyn keq te kundërshtari në zonë, me Jorgjin që akordon 11 metërsh. Jackson shënoi nga penalltia, me Likën që në fillim ndali goditjen e brazilianit.
91' Fillojnë 30 minutat shtesë.
90+5' Mbyllen 0-0 minutat e rregullta, ndeshja shkon në shtesë.
77' Tirana 0-0 Egnatia. Dwamena gjen golin për rrogozhinasit, pas asistit të Kasës. VAR ndërhyn dhe akordon pozicion jashtë loje.
62' Jackson godet shtyllën te Egnatia, me fat bardheblutë.
46' Nis pjesa e dytë.
45+3' Mbyllet 0-0 pjesa e parë në Elbasan.
25' Tirana 0-0 Egnatia. Bardheblutë mbeten me një lojtar më pak. Enea Jorgji i tregon kartonin e kuq Elvi Berishës, pas një ndërhyrje të gabuar të këtij të fundit. Tanimë finalja e Kupës së Shqipërisë vështirësohet për skuadrën e Shehit.
1' Nis ndeshja në Elbasan.
Formacionet zyrtare:
Tirana (4-3-3): Lika, Toshevksi, Najdvoski, Behiratche, Përgjoni; Hila, Deliu, Qefalija; Haxhiu, Berisha, Abazaj. Trajner: O. Shehi
Egnatia (4-3-3): Sherri; Fangaj, Malota, Memolla, Musta; Zejnullai, Mëllugja, Fernando; Kasa, Dwamena, Jackson. Trajner: E. Tetova
