TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Disa aeroporte evropiane janë përfshirë nga alarmet për kërcënime të dyshuara me bombë këtë të enjte, duke vënë në lëvizje autoritetet e sigurisë dhe duke shkaktuar devijimin e disa fluturimeve. Në disa raste, avionët civilë janë shoqëruar nga avionë ushtarakë deri në uljen e tyre.
Një nga incidentet u shënua në një fluturim të kompanisë irlandeze Aer Lingus, i nisur nga Dublini në drejtim të Romës. Pas marrjes së një kërcënimi të dyshuar me bombë, avioni ndryshoi kurs dhe u ul në mënyrë të sigurt në Évreux të Francës, nën shoqërimin e avionëve ushtarakë francezë.
Kryeministri francez, Sébastien Lecornu, bëri të ditur se në bord ndodheshin 151 pasagjerë dhe gjashtë pjesëtarë të ekuipazhit, të cilët u evakuuan pa rrezik. Në aeroport ndërhynë edhe ekipet e specializuara për çaktivizimin e mjeteve shpërthyese.
Paralelisht, autoritetet italiane u përballën me disa alarme të ngjashme. Sipas raportimeve të mediave italiane, kërcënime u regjistruan ndaj dy fluturimeve me destinacion Romën dhe një tjetër të nisur nga Milano. Një avion nga Helsinki drejt kryeqytetit italian u ul i sigurt, i shoqëruar nga avionë luftarakë italianë.
Një tjetër rast u raportua nga kompania finlandeze Finnair, e cila njoftoi për një kërcënim me bombë ndaj një fluturimi nga Helsinki drejt Vjenës, të operuar nga Jettime. Edhe ky avion u ul pa incidente në kryeqytetin austriak.
Alarmet u shtrinë edhe në Republikën Çeke, ku policia njoftoi se katër fluturime drejt Pragës ishin përballur me kërcënime të tilla. Autoritetet e aeroportit u vunë në gatishmëri për mbërritjen e avionëve.
Ndërkohë, në Bullgari, Ministria e Transportit raportoi kërcënime me bombë ndaj tre fluturimeve të Ryanair me destinacion Sofjen. Dy avionë, të nisur nga Kopenhaga dhe Madridi, u ulën në kryeqytetin bullgar, ndërsa fluturimi nga Londra u devijua drejt Plovdivit.
Kjo valë alarmesh vjen vetëm dy ditë pas një serie incidentesh të ngjashme, kur rreth 10 fluturime në Evropë morën kërcënime me bombë. Ngjarjet e së martës shkaktuan edhe mbylljen e përkohshme të aeroportit të Varshavës dhe ngritjen e avionëve ushtarakë në Itali.
Qeveria britanike i cilësoi këto kërcënime si “dashakeqe dhe të rreme”. Megjithatë, autoritetet e vendeve të prekura vijojnë verifikimet dhe zbatimin e protokolleve të sigurisë.
Deri tani, nuk raportohet për persona të lënduar apo për zbulimin e mjeteve shpërthyese në avionët e përfshirë.
