TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Rusia ka thënë se nuk do të lejojë përleshje në mes të forcave turke dhe atyre siriane, teksa vazhdon operacioni i ushtrisë turke në Siri. “Kjo është thjesht e papranueshme, prandaj ne nuk do ta lejojmë këtë gjë”, ka thënë i dërguari special i Moskës për Sirinë, Alexander Lavrentyev.
Ai ka thënë se zyrtarët turq dhe ata sirianë janë në kontakt në mënyrë që të anashkalojnë çdo konflikt. Sipas kritikëve, tërheqja e trupave amerikane nga ky rajon një javë më parë, i ka dhënë Turqisë “dritën e gjelbër” për nisje të operacionit.
Forcat kurde, që kanë ndihmuar në mposhtjen e grupit militant, Shteti Islamik në Siri, e kanë përshkruar largimin e forcave amerikane nga verilindja e Sirisë si “thikë pas shpinës”. Rusia është aleatja kyçe ushtarake e presidentit sirian, Bashar al-Assad, shkruan Rel.
Ministria ruse e Mbrojtjes ka thënë se forcat e saj, që janë të pozicionuara në Siri nga viti 2015, janë duke patrulluar në “linjën e kontaktit” në mes të forcave siriane dhe atyre turke. Turqia ka kërcënuar një kohë të gjatë se do të nisë sulme kundër luftëtarëve kurdë në Siri.
Ankaraja i konsideron kurdët sirianë si pjesë të Partisë së ndaluar të Punëtorëve të Kurdistanit, e cila ka luftuar për autonominë kurde brenda Turqisë për tri dekada me radhë.
Presidenti turk, Recep Tayyip Erdogan ka thënë se ofensiva e nisur më 9 tetor synon të krijojë një “zonë të sigurt” dhe të shënjestrojë militantët kurdë, bashkë me grupin ekstremist, Shteti Islamik në verilindje të Sirisë.
