TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Agjencia Shtetërore e Programimit Strategjik dhe Koordinimit të Ndihmës (SASPAC) dorëzoi pranë Komisionit Evropian ciklin e tretë të raportimit në kuadër të Facilitetit për Reforma dhe Rritje (RGF).
Ky cikël përfshin 38 masa reformuese të shpërndarë në pesë fusha politikash.
Plani i Rritjes për Ballkanin Perëndimor, i miratuar në maj 2024, i ofron Shqipërisë mundësinë të përfitojë deri në 922 milionë euro në grante dhe hua të favorshme për periudhën 2024–2027. Këto fonde janë të kushtëzuara drejtpërdrejt nga zbatimi i masave të dakordësuara në Agjendën e Reformave në kuadër të Planit të Rritjes, një mekanizëm që garanton transparencë dhe llogaridhënie në procesin e integrimit evropian.
Cikli i tretë strukturohet në dy komponentë kryesorë. Komponenti i parë përfshin 18 masa reformuese të reja me afat qershor–dhjetor 2026. Këto masa përfaqësojnë angazhime të reja të Shqipërisë dhe mbulojnë fushat e mjedisit të biznesit dhe zhvillimit të sektorit privat, kapitalit njerëzor, digjitalizimit, si dhe energjisë dhe shtetit të së drejtës.
Referuar këtij komponenti, janë përmbushur 14 nga 17 hapat e planifikuar me afat qershor 2026, duke arritur një nivel realizimi prej 82.4%. Gjithashtu, Shqipëria ka përmbushur edhe 4 hapa të parashikuar për periudhën raportuese të dhjetorit 2026, të cilët raportohen përpara afatit të tyre.
Komponenti i dytë përfshin 20 hapa konsolidues të parashikuar nga mekanizmi RGF, gjatë së cilës hapat e cikleve të mëparshme thellohen dhe përmbyllen në përputhje me standardet e Komisionit Evropian. Për periudhën “grace period” të qershorit 2026 janë përmbushur të 10 hapat e planifikuar, duke shënuar një nivel realizimi prej 100%. 10 hapa raportohen të përmbushura dhe nga periudha raportuese e “grace period” të dhjetor 2026.
Sipas Drejtoreshës së Përgjithshme të SASPAC dhe Koordinatore Kombëtare e Agjendës së Reformave, Eridana Çano “paraqitja e ciklit të tretë të raportimit dëshmon angazhimin e qëndrueshëm dhe të përshpejtuar të Shqipërisë ndaj Agjendës së Reformave dhe rrugëtimit evropian”.
Çdo masë e raportuar, sipas saj, “është rezultat i punës ndërinstitucionale dhe i vullnetit për të ofruar rezultate konkrete për qytetarët dhe bizneset shqiptare”.
Masat e ciklit të tretë mbulojnë fusha si: mjedisi i biznesit dhe zhvillimi i sektorit privat; kapitali njerëzor; digjitalizimi; energjia dhe tranzicioni i gjelbër; shteti i së drejtës.
Vlerësimi i suksesshëm i këtyre masave nga Komisioni Evropian do të mundësojë disbursimin e deri në 215.4 milionë eurove nga të cilat,
100.2 milionë euro do të disbursohen drejtpërdrejt në buxhetin e shtetit, ndërsa rreth 115.2 milionë euro do të kanalizohen përmes WBIF-it për financimin e investimeve strategjike në vend.
Agjencia Shtetërore e Programimit Strategjik dhe Koordinimit të Ndihmës (SASPAC) është institucioni kryesor shqiptar përgjegjës për koordinimin e mbështetjes financiare të BE-së dhe zbatimin e Agjendës së Reformave në kuadër të Planit të Rritjes për Ballkanin Perëndimor të Bashkimit Evropian.
