TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
"Pragu i tatim fitimit dhe TVSH, marrëdhënia me administratën dhe zbatueshmëria e ligjit, mbeten faktorët kryesore që influencojnë informalitetin,- vëren anketa e Këshillit të Investimeve.
Nga 1 janari i këtij viti, pragu i pagesës së tvsh u ul duke përfshirë të gjitha bizneset me xhiro mbi 2 milionë lekë në vit nga 5 milionë lekë që ishte më parë. Kjo sipas vetë bizneseve të përgjigjura në anketë, përveçse do të dëmtojë biznesin e vogël mund të rrisë më tej presionin për informalitet.
Informaliteti
Konkurrenca e pandershme që vjen nga informaliteti konsiderohet si një nga pengesat kryesore nga sipërmarrjet e ndershme për të bërë biznes në Shqipëri.
"Një pjesë e mirë e të përgjigjurve (69%) shprehen se ndeshen me një formë apo tjetër të informalitetit në fushën e aktivitetit të tyre," raporton Këshilli i Investimeve.
Sipas raportit, natyra e shfaqjes së informalitetit është e ndryshme, por rastet më të shpeshta janë evazioni fiskal për shkak të korrupsionit dhe kontrabandës, puna në të zezë, moslëshimi i kuponit tatimor, etj.
Edhe pse ka një përmirësim të perceptimit për informalitetin që vjen nga “mosrregjistrimi” i biznesit, sërish ndërmarrjet raportojnë problematike punën në të zezë.
"Puna në të zezë vazhdon të jetë sërish problem dhe pothuajse në të njëjtin nivel perceptimi si në përgjigjet në vrojtimin e Sekretariatit në vitin 2015," thuhet në anketë.
Në këto dy vjet qeveria ka zhvilluar 3 aksione kundër informalitetit, por sipas biznesit, situata vijon të mbetet problematike, ndërkohë që një shqetësim i ri i bizneseve sipas Këshillit të Investimeve, është informaliteti në sektorin e turizmit, veçanërisht për guidat dhe agjencitë turistike.
