TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Administrata Biden po përgatitet për mundësinë që qindra mijëra qytetarë amerikanë mund të duhet të largohen nga Lindja e Mesme nëse lufta në Gaza nuk ndalet, sipas katër zyrtarëve me njohuri për planifikimin emergjent të qeverisë amerikane, të cituar nga Washington Post.
Çështja e përgatitjes për një operacion të tillë vjen ndërsa forcat izraelite përgatiten për një ofensivë tokësore kundër Hamasit.
Zyrtarët, të cilët folën në kushte anonimiteti për të përshkruar në detaje diskutimet e brendshme, thanë se amerikanët që jetojnë në Izrael dhe Libanin fqinj janë veçanërisht të shqetësuar. Ata theksuan se një evakuim i këtyre përmasave konsiderohet si skenari më i keq i mundshëm dhe po shqyrtohen zgjidhje alternative.
Megjithatë, vuri në dukje një zyrtar, “do të ishte e papërgjegjshme të mos kishim një plan për gjithçka.”
Administrata amerikane, me gjithë mbështetjen e saj të fortë publike për Izraelin, është thellësisht e shqetësuar nga perspektiva e përshkallëzimit dhe ditët e fundit e ka kthyer vëmendjen pjesërisht në përgatitjet komplekse logjistike për t’iu përgjigjur një emergjence të mundshme për të lëvizur një numër të madh njerëzish.
Rreth 600,000 qytetarë amerikanë ishin në Izrael dhe 86,000 të tjerë në Liban kur Hamasi sulmoi Izraelin, sipas vlerësimeve të Departamentit të Shtetit.
Shqetësimi në Liban është kryesisht me Hezbollahun , i cili e ka kontrolluar vendin që nga viti 1992. Irani ka trajnuar prej kohësh forcat e tij dhe i ka dërguar furnizime me armë, duke ngritur shqetësimin se mund të sulmojë Izraelin nga veriu. Një front i dytë në luftë do të rriste presionin mbi forcat izraelite, me përleshje që po ndodhin tashmë përgjatë kufirit të tyre të përbashkët.
“Qeveria amerikane është shumë e shqetësuar se kjo gjë do të dalë jashtë kontrollit,” tha një zyrtar amerikan, i cituar nga Washington Post.
Shqetësimi i qeverisë amerikane nuk kufizohet vetëm në të dy vendet. Zyrtarët e Shteteve të Bashkuara po monitorojnë nga afër protestat në të gjithë botën arabe, duke e vënë personelin amerikan dhe civilët në rajonin e gjerë në gatishmëri të shtuar.
Bombardimi i Gazës ka nxitur zemërimin kundër Izraelit, ndër të tjera, për trajtimin e çështjes palestineze, një çështje që disa mendonin se nuk kishte më shumë rëndësi në botën arabe.
