TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ministri i Shëndetësisë së Shteteve të Bashkuara, Robert F. Kennedy Jr., ka njoftuar se do të kërkojë zyrtarisht nga kompanitë farmaceutike heqjen e substancës thimerosal nga vaksinat, një konservues që është bërë shënjestër e kundërshtarëve të vaksinimit dhe teorive të konspiracionit për më shumë se dy dekada.
Vendimi i Kennedy-t vjen pasi një komitet federal këshillues për vaksinat, i përbërë pjesërisht nga aleatë ideologjikë të tij, rekomandoi muajin e kaluar ndalimin e përdorimit të kësaj substance. Me firmën e ministrit, rekomandimi pritet të hyjë në fuqi.
Thimerosal nuk ka provuar të shkaktojë dëm, por mbetet subjekt polemikash
Megjithëse nuk ka prova shkencore që thimerosal – një konservues me bazë etil-merkur – shkakton dëm te njerëzit, substanca ka qenë objekt diskutimi të vazhdueshëm, sidomos nga lëvizjet anti-vaksinë.
Në SHBA, vetëm rreth 5% e vaksinave kundër gripit për të rritur përmbajnë ende këtë konservues, i cili përdoret për të parandaluar kontaminimin në flakonët me doza të shumta.
“Pas më shumë se dy dekadash vonesash, ky hap përmbush një premtim të kahershëm për të mbrojtur grupet më të ndjeshme të popullsisë nga ekspozimi i panevojshëm ndaj merkurit,” u shpreh Kennedy gjatë njoftimit të vendimit.
“Të injektosh sasi çfarëdo të merkurit në trupin e një fëmije, kur ekzistojnë alternativa të sigurta pa merkur, bie ndesh me logjikën dhe përgjegjësinë publike. Sot, vëmë në plan të parë sigurinë”, shtoi ai.
Një debat i vjetër që ringjallet
Thimerosal ka qenë pjesë e vaksinave që nga periudha e Luftës së Dytë Botërore, por filloi të hiqej gradualisht nga vaksinat pediatrike në vitin 1999, si një masë paraprake. Aktualisht, ajo gjendet vetëm në një numër të kufizuar vaksinash për të rritur.
Gazeta britanike The Guardian thekson se heqja graduale e kësaj substance në fillim të viteve 2000 u kritikua nga shumë ekspertë shëndetësorë, të cilët argumentonin se kjo nuk mbështetej në prova shkencore, dërgonte mesazhe të përziera për publikun dhe u shfrytëzua nga lëvizjet kundër vaksinimit për të nxitur dyshimet te qytetarët.
