TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Bashkimi Evropian ka publikuar një strategji të re të përbashkët për menaxhimin e krizave, duke u kërkuar vendeve anëtare të hartojnë plane kombëtare mbijetese dhe të krijojnë rezerva strategjike përballë rreziqeve si luftërat, pandemitë, krizat energjetike dhe fatkeqësitë natyrore.
Kjo iniciativë është nxitur nga rritja e tensioneve me Rusinë, por edhe nga përvojat e mëhershme me Covid-19 dhe sfida të tjera të sigurisë, përfshirë sulmet kibernetike. Komisioni Evropian synon që në të ardhmen, furnizimet kritike si ushqimet, uji, karburanti, barnat dhe pajisjet e shpëtimit të jenë të përgatitura dhe të koordinuara në nivel kontinental.
“Sa më të përgatitur të jemi, aq më pak jemi në panik,” tha komisionerja për Menaxhimin e Krizave, Haja Labib. Plani parashikon ndërtimin e një rrjeti të përbashkët evropian të rezervave të mallrave jetike, përfshirë edhe materiale teknike si urat e përkohshme, pajisjet për pastrimin e ujit, dronët dhe gjeneratorët.
BE do të ngrejë një qendër për lëndë të para kritike deri në vitin 2026, ndërsa deri në vitin 2027 pritet dyfishimi i fondeve për nxitjen e barnave inovative. Strategjia kërkon gjithashtu lista dinamike të mallrave kritike, të përshtatura për lloje të ndryshme krizash, sipas karakteristikave të çdo vendi anëtar.
Vende si Finlanda dhe Estonia, për shkak të afërsisë me Rusinë, kanë tashmë rezerva të konsiderueshme, ndërsa të tjera, si Spanja, fokusohen te rreziqe si zjarret. BE kërkon që çdo shtet të përshtasë planin sipas kërcënimeve të veta më të mundshme.
Një risi tjetër është krijimi i një rrjeti të monitorimit të ujërave të ndotura, që do të shërbejë si sistem paralajmërimi për sëmundje infektive. Gjatë pandemisë, kjo metodë rezultoi e efektshme për zbulimin e hershëm të shpërthimeve të reja virale.
BE ka tashmë një flotë emergjencash me avionë zjarrfikës dhe pajisje të evakuimit mjekësor, por kërkon shtim të kapaciteteve përballë krizave klimaterike që po intensifikohen.
Thirrje qytetarëve për përgatitje personale
Një tjetër aspekt i strategjisë është ndërgjegjësimi qytetar: çdo familje në BE është këshilluar të ketë në shtëpi një "kit emergjence" me ushqim, ujë dhe materiale bazë që mund të mbulojnë nevojat për të paktën 72 orë në rast lufte apo fatkeqësie.
Shtete si Suedia kanë nisur shpërndarjen e miliona fletëpalosjeve me udhëzime për përgatitje ndaj luftës, ndërsa Danimarka dhe Britania kanë strategji të ngjashme për forcimin e qëndrueshmërisë së brendshme.
Mbështetur në filozofinë e “parandalimit para krizës”, BE e konsideron këtë strategji si një kthesë në qasjen ndaj mbrojtjes civile. Siç e përmbledh komisionerja Labib: “Rreziqet nuk janë më teorike – ato janë reale dhe në rritje. Tani është koha për t’u përgatitur.”
