TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Aktori dhe regjisori i njohur amerikan, Ben Affleck, ka zbuluar se ka përdorur Inteligjencën Artificiale gjatë realizimit të filmit të tij të ri, “Animals”, i cili pritet të publikohet në Netflix.
Gjatë një eventi të Bloomberg, Affleck pranoi se AI është përdorur në disa aspekte të filmit, por refuzoi të tregojë konkretisht se për çfarë është përdorur teknologjia.
“E përdora për shumë gjëra në këtë film. Hezitoj të them saktësisht se çfarë janë ato, ose edhe të flas për to, sepse në punën time përpiqemi të kultivojmë iluzionin e realitetit”, u shpreh Affleck.
Aktori e krahasoi këtë me një shfaqje magjie, duke thënë se një magjistar nuk do të zbulonte paraprakisht se si realizohen truket e tij.
Affleck, i cili drejton dhe luan në “Animals”, e cilësoi filmin si një shembull të mënyrës se si Inteligjenca Artificiale mund të përdoret në mënyrë etike në industrinë e filmit.
“Është një formë tjetër e teknologjisë kompjuterike… një zhvillim teknologjik që përshtatet në mënyrë të përkryer në linjën e gjatë të përmirësimeve teknologjike që kemi bërë në film dhe televizion”, tha ai.
Megjithatë, Affleck nuk beson se AI mund të zëvendësojë krijimtarinë njerëzore. Sipas tij, teknologjia nuk do të jetë në gjendje të krijojë një film që njerëzit do të duan ta shohin vetëm duke marrë një komandë të shkruar.
“Animals” është një thriller ku Affleck interpreton rolin e një kandidati për kryetar bashkie në Los Angeles, djali i të cilit rrëmbehet për shpërblim. Në film luajnë gjithashtu Kerry Washington, Steven Yeun dhe Gillian Anderson.
Në mars, Affleck ia shiti Netflix startup-in e tij të Inteligjencës Artificiale, InterPositive. Kompania kishte zhvilluar teknologji të synuar për përdorim në proceset e post-produksionit të filmave dhe serialeve.
