TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Nga Bujar Nishani
Ndërsa situata përkeqësohet prej virusit, qeveria shqiptare ndryshe nga çdo qeveri tjetër në vendet e prekura konsumon kohën që është një prej “ilaçeve” të mundëshme sot në lehtësimin e situatës me sulme ndaj opozitës dhe mallkime ndaj qytetarëve.
Prej ditësh opozita propozon masa konkrete dhe ofron ide konkrete të këtyre masave, por qeveria vijon jo vetëm ti injorojë propozimet e arsyeshme të opozitës por merr kohën e çmuar të tallet me to e të fyejë opozitën.
Ndërkohë jeta e qytetarëve shqiptarë përkeqësohet nga dita në ditë dhe rreziku nga infektimi rritet në përmasat e vendeve më të goditura.
Dy tregues janë evidentë në këtë situatë në Shqipëri.
1- Propaganda e gënjeshtërt qeveritare dhe
2- Situata kritike e shëndetit të qytetarëve që po përkeqësohet.
Propaganda shkon përtej asaj qesharakes që improvizon kryeministri i vendit me mizanskena, batuta, hakërrime.
Ajo shkon atje ku nuk duhet toleruar pasi shndërrohet në rrezik evident për jetën e shqiptarëve..
Monitorimi i situatës, në këtë rast me testime, tek individët vunerabël dhe grupet e historikut të të sëmurëve është në situatën e propagandës dhe jo seriozitetit.
Përtej rastit kur një media investigative demaskoi prezantimin e gënjeshtërt të kryeministrit i cili e paraqiste Shqipërinë si rastin më të mirë të testimeve të bëra krahasuar me vendet e rajonit tonë, le ti referohemi shifrave të vetë qeverisë të cilat nxjerrin zbuluar propagandën e saj të gënjeshtërt.
Referohemi dy prej raportimeve të bëra nga qeveria mbi testet e bëra.
Në njërin rast raporton se në 45 testime ka identifikuar 15 raste të infektuara, pra i bie që 33% e qytetarëve dolën të infektuar.
Në një rast tjetër në 35 testime ka identifikuar 13 raste të infektuar pra i bie 37% e qytetarëve të infektuar.
Po të bëjmë një krahasim të këtij proçesi me vendet e rajonit tonë shohim se Serbia në 374 testime ka rezultuar 72 raste të infektuara, pra 19% e tyre.
Në Bosnje-Hercegovinë në disa raste të raportuara kemi ; (117 të testuar me 9 të infektuar, pra 7,6% e tyre, në rastin tjetër 54 të testuara dolën 3 të infektuar, pra 5,5 % e tyre dhe në rastin tjetër 74 të testuar me 4 të infektuar, pra 5,4 % e tyre).
Në Malin e Zi, në 104 të testuar, rezultuar 22 të infektuar, pra 21,5 % e tyre.
Duket pra qartë se situata e përhapjes në Shqipëri (sipas algoritmit, që pëlqen të artikulojë kryeministri ) është shumë më e rëndë se në vendet e tjera të rajonit.
Kjo e ka arsyen e saj, tek mungesa e reagimit ndaj të ardhurve në Shqipëri nga Italia, por sot ajo nuk ka më vlerë, sot papërgjegjshmëria ka kaluar tek mungesa e testeve të nevojshme për ta izolouar virusin sa më shumë.
Pjesa e dytë, ajo e përkeqësimit të situatës në Shqipëri duket tek % e vdekshmërisë në raport me të identifikuarit si të infektuar.
(informacionet e mia të verifikuara tregojnë për vdekje të paraportuara nga qeveria).
Në Shqipëri, sipas raportimeve zyrtare te deritashme vdekshmëria në raport me të identifikuarit është shumë e lartë, 4,7%. Ndërkohë në rang botëror ajo është 4,3%, shifër që është e tillë për shkak të % së lartë në Itali dhe Spanjë.
Shqipërisë deri tani ja kalojnë në këtë mortalitet vetëm Italia, Spanja dhe Irani.
Në të gjitha vendet e tjera vdekshmëria është më e ulët se 4,7%.
Kështu Kina e ka 3,6 % , USA 1,1%, ndërsa në rajonin tonë ; Greqia 2,4%, Kroacia 0.3%, Serbia 0,8%, Maqedonia Veriut 1,4%.
Duke analizuar vetëm këto dy tregues kuptohet fare mirë se propaganda e gënjeshtërt ndaj qytetarëve dhe sulmet e ulta politike ndaj opozitës nuk janë as puna që duhet të bëjë qeveria dhe as masat e nevojshme që duhen marrë për të lehtësuar sa më shumë rrezikun.
Çdo ditë që kalon nuk kthehet më !
Çdo mungesë e veprimeve të duhura dhe paaftësi për të identifikuar masat e nevojshme do ti shtojë armiqtë ndaj shqiptarëve në këtë përballje me të keqen.
*Të dhënat janë marrë nga statistikat e buletinit të OBSH dhe vendeve përkatëse të dt. 23 mars 2020/ Të ringremë Shqipërinë
