AKTUALITET, 19 Maj 2024, 15:01

Vodhi kamionçinën në një parkim privat dhe u përplas me disa automjete të parkuara, kapet në Kamëz 62-vjeçari i droguar nga Korfuzi

Vodhi kamionçinën në një parkim privat dhe u përplas

Një 62-vjeçar nga Korfuzi është kapur në zonën e Kamzës dhe akuzohet për tre vepra penale, “Vjedhje”, “Shkatërrimi i pronës”, dhe “Drejtimi i automjeteve në mënyrë të parregullt”.

Policia thotë se gjatë natës, 62-vjeçari në një parkim privat, ka vjedhur një automjet tip kamionçinë, dhe gjatë tentativës për tu larguar është përplasur me disa automjete të parkuara.

Ndërkohë pasi iu bë testi, rezultoi se ai ishte nën efektin e lëndëve narkotike.

Specialistët për Hetimin e Krimeve të Komisariatit të Policisë Nr. 5 arrestuan shtetasin N. Ch., 62 vjeç, banues në Korfuz, për veprat penale “Vjedhja”, “Shkatërrimi i pronës”, dhe “Drejtimi i automjeteve në mënyrë të parregullt”.

Ky shtetas, më datë 19.05.2024, rreth orës 02:00, në Paskuqan 2, në një parkim privat, ka vjedhur një automjet tip kamionçinë, dhe gjatë tentativës për tu larguar është përplasur me disa automjete të parkuara. Pas testimit me AquilaScan, 62-vjeçari ka rezultuar nën efektin e lëndëve narkotike.

Materialet i kaluan Prokurorisë, për veprime të mëtejshme.