TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kreu i PD, Sali Berisha ndodhet në bjeshkët e Istogut këto ditë.
Ai ka marrë pjesë në ditëlindjen e 60-të të biznesmenit të njohur në Kosovë, Gani Dreshaj, ndërsa shoqërohej edhe nga dhëndri i tij, Jamarbër Malltezi.
Berisha ishte ulur në tavolinën kryesore së bashku me Dreshajn dhe ish-kryeministrin e Kosovës, Ramush Haradinaj, teksa shijonin darkën.
“24 orë në magjinë e bjeshkëve të Istogut
Miq, 24 orët që kaluan ishin një udhëtim në rininë time.
Në Istog shkova i ftuar nga një mik i imi, Gani Dreshaj, politikan dhe biznesmen i Kosovës, ish-luftëtar i lirisë, për të marrë pjesë në festën e 60-vjetorit të lindjes së tij.
Pas një ndalese të shkurtër dhe takimit me miqtë e përbashkët gjermanë ,deputetin e Bundestagut Peter Beyer, politikanin e shquar Elmar Brock, ish-komandantin e KFOR-it në Kosovë gjeneralin Bühler, si dhe gazetarë e biznesmenë gjermanë, u nisëm për në zemër të bjeshkëve të Istogut, në Lugun e Butë.
Në mesin e një bredhishtë madhështore ndodhej shtëpia e Ganiut, në oborrin e së cilës u organizua festa. Në rrethimin e shtëpisë ngrihej një muranë në kujtim të gjyshit të tij, mjekut Syl Dreshaj, gjyshes dhe xhaxhait të ekzekutuar nga ushtria serbe gjatë bombardimeve të NATO-s.
Në Lugun e Butë na pritën me shumë përzemërsi i ati i Ganiut, bashkëshortja, vëllezërit, motrat, fëmijët dhe rrethi i tyre familjar. Familja Dreshaj është një familje e madhe atdhetare me kontribute të veçanta në të gjitha kohërat e luftërave për liri. Në këtë traditë, të gjithë, të mëdhenj e të vegjël, edhe në luftën e fundit, në radhët e UÇK-së, firmosën me trimërinë dhe gjakun e tyre lirinë që gëzojmë sot në Kosovën e pavarur.
Darka ishte vërtet magjepsëse, jo vetëm për vendin, logun e zanave ku shtrohej, por edhe për atmosferën festive të miqve e të ftuarve, këngët e artistëve dhe shërbimin e përkryer. Ishte një mbrëmje frymëzuese dhe mund të shkruaja gjatë për të, por po e mbyll duke i uruar edhe një herë Ganiut edhe 120 vite të tjera plot shëndet, gëzim dhe suksese me më të dashurit e tij”, ka shkruar Berisha krahas fotove.
Berisha prej disa ditësh nuk ka zhvilluar konferenca dhe mesa duket ka vendosur të pushojë disa ditë para nisjes së sesionit të ri parlamentar në shtator.
