AKTUALITET, 3 Mars 2024, 18:49

Shpërthimi në biznesin e deputetit socialist të Lushnjes, ish-drejtoresha e Tatimeve: Ky është krim shtetëror

Shpërthimi në biznesin e deputetit socialist të Lushnjes,

Para dy ditësh në Lushnjë ndodhi një shpërthim, ku humbën jetën babë e bir dhe mbetën të plagosur disa persona të tjerë.

Ky nuk është i vetmi rast, pasi ka patur më herët dhe të tjerë “viktima” që kanë humbur jetën në vendin e punës, siç shkruan në një postim të saj ekspertja e ekonomisë, Brisida Shehaj, që ka punuar edhe si drejtoreshë e Tatimeve në qeverinë "Rama", e cila e quan ngjarjen krim shtetëror.

“Sigurisht me këtë status nuk dua të lëndoj askënd, por nuk kuptoj kronikën e televizionit Top-Channel që shoqëronte Taulant Ballën dhe Eriselda Sefën (Kryetare e Bashkisë Lushnje) me një shpurë të madhe nga pas në familjen e dy të ndjerëve që humbën jetën në shpërthimin e magazinës në Lushnje.

Përse shteti nuk ka ngushëlluar dhe familjet e tjera që kanë humbur të afërmit e tyre nga aksidente në punë?

Fare e thjeshtë, sepse ky është krim shtetëror dhe me këtë nuk po bëj aspak politikë”, shkruan Shehaj në postimin e saj.

Statusi i Brisida Shehaj

“Në datën 25 janar, një 53-vjeçar ka humbur jetën në vendin e punës në Divjakë.

Në datën 1 dhjetor 2023 një tjetër punonjës humb jetën në Elbasan.

Nuk numërohen jetët e humbura në miniera.

Sigurisht me këtë status nuk dua të lëndoj askënd, por nuk kuptoj kroniken e televizionit Top-Channel që shoqëronte Taulant Ballën dhe Eriselda Sefën (Kryetare e Bashkisë Lushnje) me një shpurë të madhe nga pas në familjen e dy të ndjerëve që humbën jetën në shpërthimin e magazinës në Lushnje.

Një kronikë e shëmtuar, një përdhosje e dhimbjes së familjarëve, të cilët sigurisht i kishin të hapura për këdo dyert e mortit.

Pse ky aksident nuk ishte i njëjtë me të tjerët? Përse shteti duhet të zbarkonte që ditën e parë në magazinë e sot në familjen e viktimave?

Përse shteti nuk ka ngushëlluar dhe familjet e tjera që kanë humbur të afërmit e tyre nga aksidente në punë?

Fare e thjeshtë, sepse ky është KRIM SHTETEROR dhe me këtë nuk po bëj aspak politikë.

Taulant Balla nxitoi që ditën e aksidentit të shkonte në Lushnjë dhe të fliste dhe për dëmet e shkaktuara te banesat afër dhe se do mbuloheshin dëmet.

Përse? Përse duhet të paguajë buxheti i shtetit për dëme të shkaktuara nga një biznes privat?

Ky shtet që ende sot s’ka mbuluar pasojat e tërmetit të vitit 2019 dhe kur them pasoja flas për ata që mbetën në qiell të hapur se ata që kishin dëmtime i kanë paguar të gjitha nga xhepi i tyre.

Ky shtet që do të na detyrojë të gjithëve të paguajmë për sigurimin e banesës te një kompani shtetërore si ka mundësi ka lejuar atë biznes të operojë si me qenë në tokë të babës?

Përgjigjet për mua janë të qarta, një shtet i kriminalizuar, një kuvend i kriminalizuar do të prodhojë vetëm krime dhe më pas do mundohet të fshehë gjurmët.

Kështu do jetë edhe në këtë rast që askush s’do denohet, kështu do jetë dhe për krimin e Bashkisë Tiranë me përdhosjen e varreve, kështu do jetë dhe me denoncimin e ZERI për trafikun e drogës nga taksitë në Tiranë…

Por mos u mërzisni, nesër do arrestohet ndonjë adoleshent pse vodhi në supermarket, do jepen pamje nga aksioni i bujshëm dhe BRAVO LANTI DHE POLICIA.

Nejse se ju bezdisa se keni hallin e atij të shkretit që e futën në BB për ta parë policia dhe ta arrestonin live.

Se për krimin në Lushnjë nuk foli më askush.

Ngushëllime familjes”.