TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shtatë emigrantët nga Egjipti dhe Bangladeshi që erdhën në Shqipëri të premten do të kthehen sërish sonte në Itali, kjo pas vendimit të gjykatës së Romës, e cila vendosi pezullimin e ndalimit të tyre.
Mediat në Itali raportojnë se emigrantët do të transportohen drejt Brindisit me anijen e Rojes Bregdetare.
Më pas të 7 emigrantët do të transferohen në një qendër për azilkërkuesit në zonën e Pulias për t’iu nënshtruar procesit të zakonshëm të aplikimit.
“Logjistika e transferimit ishte organizuar në mënyrë adekuate paraprakisht. Një shenjë se autoritetet italiane ishin në pritje të lajmit”, shkruajnë mediat italiane.
Po sipas mediave në Romë bëhet e ditur se Ministria e Brendshme e Italisë, do të dalë para Gjykatës Evropiane të Drejtësisë për të mbështetur arsyet e saj pas vendimeve të gjyqtarëve të Gjykatës së Romës që sot pezulluan vlefshmërinë e paraburgimit për 7 emigrantët e sjellë në Shqipëri të premten e kaluar.
