TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Drejtoria Hetimore Antimafia e Barit dhe Autoritetet Shqiptare, me ndihmën e Interpolit, të Zyrës së Ekspertit për Sigurinë në Tiranë dhe të Policisë Shqiptare, në kuadër të një Ekipi të Përbashkët Hetimor, kanë ekzekutuar, me urdhër të Drejtorisë Rajonale Antimafia të Barit dhe Prokurorisë së Posaçme Antikorrupsion dhe Kundër Krimit të Organizuar të Tiranës, nën koordinimin e Eurojust (Hagë) dhe të Drejtorisë Kombëtare Antimafia dhe Antiterrorizëm të Romës, dy masa sigurie, të lëshuara nga Gjykata për Hetimet Paraprake e Barit dhe nga Gjykata e Posaçme e Shkallës së Parë për Korrupsion dhe Krim të Organizuar në Tiranë, ndaj gjithsej 52 personave përgjegjës, në forma të ndryshme, për trafik ndërkombëtar të sasive të mëdha të substancave narkotike, pastrim parash dhe shpërdorim detyre.
Gjithashtu janë ekzekutuar urdhra sekuestrimi pasuror në Shqipëri dhe në Itali, lidhur me pasuri të luajtshme dhe të paluajtshme, me një vlerë prej disa miliona eurosh.
Masat e sigurisë, të lëshuara në kuadër të Operacionit URA si rezultat i hetimeve të kryera nga DIA e Barit nga shtatori 2021 deri në qershor 2022, kanë mundësuar grumbullimin e provave të forta të fajësisë kundër të hetuarve, shqiptarë dhe italianë, që në Itali i përkasin dy shoqatave kriminale – të njohura si të tilla nga G.I.P. i Barit – të vendosura në po të njëjtin qytet (konstatim i bërë në fazën e hetimeve paraprake që kërkon verifikim të mëtejshëm gjatë procesit gjyqësor me përfshirjen e mbrojtjes); ndërsa në Shqipëri, bëhet fjalë për një grup të fuqishëm kriminal të organizuar – i njohur si i tillë nga Gjykata e Tiranës – me qendër në Durrës.
DIA, në lidhje me sasi të mëdha heroine dhe kokaine të trafikuara që nga viti 2016, mes Ballkanit, Europës Veriore, Amerikës së Jugut dhe Puglias, ka dokumentuar ekzistencën e një bashkëpunimi interesash ndërmjet grupit kriminal në Shqipëri, që kishte për detyrë – në nivel transnacional – tregtimin dhe transferimin e drogës, dhe dy shoqatave kriminale që vepronin në Bari të cilat, pasi e përpunonin dhe paketonin drogën në “panete”, e furnizonin me shumicë organizatat kriminale në Bari, Brindizi dhe Leçe, të interesuara për heroinën dhe kokainën – me cilësi të lartë – të ardhura nga Turqia dhe Amerika Latine.
Hetimet komplekse, të kryera përmes përgjimeve telefonike, ambientale, video-regjistrimeve dhe shërbimeve të vëzhgimit, ndjekjes dhe kontrollit, të mbështetura nga përftimi dhe analiza e bisedave të enkriptuara nga platforma SKYECC, si dhe deklaratat e tre bashkëpunëtorëve të drejtësisë (të cilëve u është vërtetuar besueshmëria), kanë mundësuar dokumentimin, ndër të tjera, të furnizimeve të shumta (255 kg heroinë "e pastër" dhe kokainë "e pastër") dërguar në Bari, kryesisht nga Shqipëria dhe Europa Veriore, përmes korrierëve ndërkombëtarë. Në të njëjtin kontekst është rindërtuar një “rrjedhë” e pandërprerë parash të gatshme nga Puglia në Shqipëri, si pagesë për drogën e tregtuar me shumicë, e cila realizohej përmes drejtuesve të autobusëve ndërkombëtarë; transaksione të paligjshme, për një shumë totale prej 4.5 milionë eurosh, që i mundësuan autoriteteve shqiptare të akuzonin për pastrim parash.
Në këtë kuadër janë rindërtuar gjithashtu: disa dorëzime parash në dorë për pagesën e drogës, të ndodhura në Bari, për shuma që kapnin edhe mbi gjysmë milioni euro; transferimi i mbi 500 mijë dollarëve nga Shqipëria në Amerikën Latine, si parapagim për një sasi prej 500 kg kokaine të dërguar nga Guayaquil (Ekuador); episode të shpërdorimit të detyrës të ndodhura në territorin shqiptar.
Provat e përdorura për të dëshmuar aktivitetin e tre organizatave kriminale transnacionale përfshinin një sekuestrim të mëparshëm të 3 milionë eurove në para të gatshme në Durrës (Shqipëri) si dhe sekuestrime të drogës të kryera në rrethana të ndryshme: mbi 30 kg heroinë dhe disa “laboratorë artizanalë” në Bari dhe rrethina për përpunimin dhe paketimin e drogës; 2 tonë kokainë në portin e Roterdamit (Holandë); 932 kg kokainë në portin e Gioia Tauro (Reggio Calabria); 400 kg hashash në Noicattaro (Bari).
Risi e këtij hetimi është përdorimi, si burim prove, i bisedave të enkriptuara të platformës SKYECC, të përftuara përmes Urdhrave Evropianë të Hetimit nga Gjykata e Parisit. Mesazhet, pasi janë deshifruar nga hetuesit e DIA-s së Barit dhe janë ndarë me Oficerët e SPAK-ut të Tiranës, janë analizuar me imtësi dhe janë krahasuar me rezultatet e tjera të hetimit, duke lejuar ngritjen e akuzave penale si për D.D.A. e Barit ashtu edhe për Autoritetin Gjyqësor Shqiptar.
G.I.P. i Gjykatës së Barit, z. Francesco Vittorio Rinaldi, duke pranuar rezultatet hetimore të DDA-së lokale (deri në këtë fazë, me rezervën e vlerësimit në fazat e mëvonshme me përfshirjen e mbrojtjes), ka pranuar “hapin cilësor”, sidomos nga pikëpamja e përdorimit të mjeteve teknologjike të avancuara, “knoë-hoë”-n dhe “aftësinë sipërmarrëse” të trafikantëve shqiptarë të drogës, të aftë për të menaxhuar “holdinge kriminale” të mirëfillta dhe për të furnizuar grupet mafioze dominante në qytetin e Barit.
Masat kufizuese të dhëna nga Gjykata e Tiranës përfshijnë, ndër të tjerë, krerët e një familjeje të fuqishme dominante në qytetin e Durrësit, një komandant dhe një oficer të Policisë Shqiptare, një avokat dhe 6 shoferë të autobusëve ndërkombëtarë.
Masat pasurore (aktualisht, me rezervën e verifikimit të mëtejshëm në fazën vendimmarrëse me përfshirjen e mbrojtjes) kanë përfshirë në Itali sekuestrimin paraprak për konfiskimin e pasurive të luajtshme dhe të paluajtshme, ndër to 9 apartamente, 4 shoqëri, 7 llogari bankare dhe 3 automjete; ndërsa në Shqipëri sekuestrimin e disa pasurive të paluajtshme, 2 kompani ndërtimi, 4 restorante luksoze, 1 agjenci imobiliare, 1 rrjet televiziv, me një vlerë të përgjithshme të vlerësuar në disa milionë euro.
Zbatimi i këtij operacioni ndërkombëtar është bërë i mundur falë Ekipit të Përbashkët Hetimor, një instrument i bashkëpunimit gjyqësor i krijuar ndërmjet D.D.A. së Barit, S.P.A.K.-ut të Tiranës dhe Eurojust (organizatë që mbështet bashkëpunimin gjyqësor në luftën kundër formave të rënda të krimit ndërkufitar), i cili i ka mundësuar stafit të DIA-s së Barit dhe autoriteteve shqiptare të zhvillojnë hetime të përbashkëta të thelluara, duke përfituar nga roli thelbësor i koordinimit i siguruar nga Drejtoria Kombëtare Antimafia dhe Antiterrorizëm.
Operacioni i sotëm është pjesë e një projekti më të gjerë hetimor i DDA-së së Barit dhe SPAK-ut të Tiranës për të luftuar trafikun e pandërprerë ndërkombëtar të kokainës dhe heroinës, të menaxhuar nga organizatat kriminale shqiptare. Në këtë kuadër, si rezultat i operacioneve të mëparshme “Shefi”, “Kulmi” dhe “Shpirti”, ndërmjet viteve 2018 dhe 2021, DIA e Barit ka ekzekutuar gjithsej 118 masa sigurie, ka sekuestruar pasuri të luajtshme dhe të paluajtshme për disa milionë euro dhe ka zbuluar mbi gjashtë ton drogë midis marijuanës, kokainës dhe hashashit, duke mundësuar, në të gjitha shkallët e gjykimit, dënime për secilin të pandehur deri në 20 vite burgim.
Masat e sotme të sigurisë – ndaj 12 shtetasve italianë dhe 40 shqiptarëve, të vendosur në burg (49), në arrest shtëpie (1) dhe me detyrim paraqitjeje pranë Policisë Gjyqësore (2) – janë ekzekutuar, në zbatim të një urdhër-arresti ndërkombëtar, në Shqipëri në qytetet e Durrësit, Shkodrës, Tiranës, Fierit, Vlorës; në Itali në Bari dhe rrethina, Oria (Br), Matera, Frosinone, Torino, Cosenza, Trento, Como, Cremona dhe Pomezia (Rm), si dhe në Belgjikë.
Është e rëndësishme të theksohet se procedimi penal ndodhet ende në fazën e hetimeve paraprake dhe se çdo fajësi për akuzat e ngritura do të duhet të vërtetohet në gjykim, në përputhje me të drejtën e mbrojtjes së të hetuarve.
