TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pak ditë më parë, Ervin Karamuço që e quan veten "profesor të kriminalistikës", shkaktoi një katrahurë të madhe publike pasi tha se SPAK ka në dorë një video erotike të një moderatoreje shumë të njohur, e cila ishte nxjerrë nga aparati celular i një të shumëkërkuari nga Policia e Shtetit. Por ky deklarim i bërë në një studio televizive u rrëzua nga ekspertët që thanë se aplikacioni i përfolur nga "profesori" nuk shpërdan video, por dhe që doli të ishte krijim me anë të Inteligjencës Artificiale, duke nxjerrë blof Karamuçon. Moderatorja e përfolur, Luana Vjollca, u përgjigj me gjuhë të ashpër , duke kërkuar ndëshkimin e manipulatorëve që hedhin baltë mbi figurat e grave dhe vajzave, duke bërë thirrje edhe për reagim publik.
Mbrëmë, në të njëjtën studio, "Profesori i kriminalistikës" deklaroi se Shqipëria ka shmangur një ngjarje kriminale disa ditë më parë, që mund të kishte pasoja në marrëdhëniet me Rusinë.
"Profesori" Karamuço shquhet për deklarata "bombastike", sidomos ato me rrafsh ndërkombëtar, apo rreth personazheve të njohur, duke u bërë kryetitull në mediat online dhe është në të njëjtin nivel me deklarimet e avokatit të ditur shqiptar, Spartak Ngjela. Dhe që të dy thuhet se paguhen shtrenjtë për "bombat" mediatike që lëshojnë në televizione.
Deklarata e Karamuços
Në emisionin “Zonë e Lirë” në ABC News, Karamuço u shpreh se një shtetas rus, i cili kërkohet nga Interpoli i Moskës, është ndaluar në kufi dhe u mbajt në një burg në veri të Shqipërisë.
Sipas Karamuços, ky shtetas aktualisht po ruhet në Tiranë, teksa Rusia pret ekstradimin e tij.
Ndër të tjera, Karamuço nënvizoi se rusi është krahu i djathtë i një prej eksponenëve më të mëdhenj të mafies ruse dhe Rusia kërkon që ai të bëhet bashkëpunëtor i drejtësisë.
“Ka ndodhur një gjë që shumë pak veta e dinë. Shqipëria ka shmangur, këto ditë, një ngjarje shumë të rëndë kriminale, që mund të kishte pasoja në marrëdhëniet me Federatën Ruse. Kjo ka ndodhur në vigjilje, përpara se të ndodhte ngjarja e Mitrovicës, ka qenë një informacion që na ka ardhur dhe nga partnerët. Një rus, u ndalua nga ne, i cili ishte në kërkim nga Interpol Moska. U ndalua në kufi, është çuar në një burg në veri të Shqipërisë.
Më pas ka ardhur një informacion urgjent, kishte dy mundësi, ose do ta vrisnin në burgjet tona dhe do mbante llogari shteti shqiptar, ose mund të kishte një organizim përmes organizatave të rrjetit ballkanik kriminal, një përpjekje për ta nxjerrë nga burgu, duke sulmuar. Këto ishin dy alternativat që erdhën si informacion.
E kanë sjellur urgjent, brenda ditës, për 2 orë, nga burgu që është në veri të Shqipërisë, e kanë sjellë në mes të Tiranës dhe e ruajnë derisa ai të ekstradohet në drejtim të Rusisë. Është akoma këtu. Ky është një sukses shumë i madh i SHKB të burgjeve, Ministrisë së Drejtësisë, Drejtorisë së Burgjeve dhe Policisë së Shtetit.
Kanë qenë bashkë të lidhura, edhe për të marrë informacionin në kohë reale dhe për të evituar këtë lloj përplasjeje që mund të ndodhë. Ky është krahu i djathtë i një prej eksponenëve më të mëdhenj të mafies ruse dhe ata kanë pasur dy probleme, ose donin ta vrisinin që ky të mos fliste, sepse duke ardhur në Moskë, mund të bëhej bashkëpunëtor i drejtësisë e të fliste për shumë personazhe të tjerë, ose për ta shpëtuar, për të mos e kthyer në Moskë, që të mos jepte informacion. Rrezikonte një familje mafioze. Shteti rus po kërkon për ta kthyer. Është duke u gjykuar për ta dhënë”, theksoi ai.
