TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Deputetja e Partisë Demokratike Jorida Tabaku reagoi në Kuvend pas ofendimit që, sipas opozitës, deputeti socialist Taulant Balla i drejtoi deputetes Albana Vokshi gjatë seancës plenare.
Në fjalën e saj në parlament, Tabaku tha se në sallën e Kuvendit mund të ketë debate të forta politike, por sipas saj një ofendim në këtë nivel ndaj një kolegeje nuk ka ndodhur më parë.
Ajo kritikoi gjithashtu mazhorancën, duke thënë se deklaratat për fuqizimin e grave bien ndesh me sjellje të tilla në parlament.
Tabaku theksoi se Vokshi është para së gjithash një nënë dhe se askush nuk do të dëshironte që fëmijët e tyre të dëgjonin një gjuhë të tillë në parlament.
Ajo u bëri thirrje deputetëve socialistë që të mos e politizojnë çështjen dhe të mbështesin kolegen e ofenduar, ndërsa kërkoi edhe reagim institucional.
Jorida Tabaku: Zoti kryetar, në këtë sallë ne mund të kemi pasur shumë debate politike me njëri-tjetrin, nuk kemi rënë dakord me njëri-tjetrin, nuk jemi miq e shokë. Por që të ofendohet një kolege, në këtë nivel, nuk ka arritur asnjëherë në këtë sallë, të paktën në 12 vitet që unë jam këtu. Është cenuar dinjiteti i një kolegeje. Ju rrini gjithë ditën dhe mburreshi se si po i fuqizoni gratë, dhe kështu është fuqizimi juaj i grave? Kjo shprehje që u tha në këtë podium këtu, më pas del nga kjo sallë, i përplaset fytyrave, fëmijëve, grave, zonjave dhe kthehet edhe në një normë e standard.
Zonja Vokshi është nënë në radhë të parë. A donte dikush nga ju që fëmijët tuaj të dëgjonin atë shprehje? Unë nuk do ta doja. I bëj thirrje kolegëve socialiste, së pari të mos ndahemi politikisht për këtë çështje. Të lëmë politikën mënjanë dhe të mbështesim një zonjë që është ofenduar.
Së dyti, i bëj thirrje kolegëve të Komisionit të Jashtëm, drejtuar këtu dhe kryetarit, zoti Hasani. Zëvendëskryetarja e tij është ofenduar. Ju bëj thirrje, kryetar, që së pari të dënoni aktin. E më pas, të kërkohet ndjesë ashtu siç i meriton zonja. Jo të justifikohet me një sjellje që, në gjykimin tonë, edhe e përshkallëzoi akoma dhe më shumë ofendimin.
