TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Zëvendëspresidenti amerikan, JD Vance, ka reaguar pas humbjes së republikanëve në zgjedhjet e mesmandatit, duke ia atribuar rezultatin kryesisht luftës dhe pakënaqësisë së votuesve ndaj politikave të administratës së Donald Trump.
Në një reagim të gjatë, Vance pranoi se një pjesë e konsiderueshme e amerikanëve që në vitin 2024 kishin votuar për Donald Trump dhe JD Vance, këtë herë u kthyen kundër republikanëve dhe mbështetën kandidatët demokratë.
Sipas tij, arsyeja e humbjes nuk ishte pjesëmarrja e ulët e elektoratit republikan, por fakti se shumë prej votuesve të partisë dolën në qendrat e votimit, por zgjodhën të mos votonin më për kandidatët e tyre.
Vance: Votuesit tanë dolën të votojnë, por nuk votuan për ne
Zëvendëspresidenti bëri të ditur se analizat e brendshme të fushatës republikane kishin sinjalizuar pakënaqësi të konsiderueshme mes votuesve që kishin mbështetur Trump në zgjedhjet e vitit 2024.
Ai përmendi edhe një bisedë me një analist të njohur të të dhënave zgjedhore, i cili e kishte paralajmëruar se republikanët mund të merrnin një rezultat më të mirë nga sa parashikonin sondazhet, por se një pjesë e elektoratit të tyre rrezikonte të kalonte në krahun e kundërshtarëve.
Si shembull, Vance solli Floridën, ku republikanët kishin një avantazh prej nëntë pikësh në përbërjen e elektoratit krahasuar me demokratët, por kjo nuk mjaftoi për të shmangur humbjen.
Katër arsyet që larguan votuesit nga Trump
Sipas Vance, sondazhet kishin identifikuar katër çështje kryesore që kishin ndikuar në ndryshimin e qëndrimit të votuesve republikanë:
-Përfundimi i luftës.
-Ulja e kostos së jetesës dhe përballja me inflacionin.
-Rikthimi te politika “Amerika e Para”.
-Ndryshimi i marrëdhënieve të Shteteve të Bashkuara me Izraelin.
Sipas tij, këto katër çështje përmblidhnin thuajse të gjitha arsyet e pakënaqësisë së votuesve që ishin larguar nga republikanët.
Vance iu referua gjithashtu qëndrimeve në favor të një zgjidhjeje diplomatike të konfliktit, duke vlerësuar se këshilla për të ndjekur këtë rrugë kishte qenë e drejtë.
“Të gjithë e dinë pse humbëm”
Në reagimin e tij, zëvendëspresidenti paralajmëroi se gjatë javëve dhe muajve të ardhshëm do të ketë përpjekje për të dhënë shpjegime të ndryshme për humbjen e republikanëve, por këmbënguli se shkaku kryesor ishte lufta.
“Arsyeja pse humbëm është lufta. Edhe vetë presidenti e tha mbrëmë”, deklaroi Vance.
Ai shtoi se kushdo që mendon se kostoja politike e luftës ia vlejti, duhet ta thotë hapur. Megjithatë, sipas tij, çdo diskutim serioz për të ardhmen e Partisë Republikane duhet të nisë nga pranimi i kësaj të vërtete.
Në fund të reagimit, Vance iu drejtua edhe votuesve të zhgënjyer të republikanëve, duke pranuar se paralajmërimet e tyre kishin qenë të drejta.
“Për ata që janë të zemëruar dhe duan të thonë ‘ne jua thamë’, keni të drejtë, na e kishit thënë”, u shpreh ai.
Zëvendëspresidenti i ftoi votuesit e pakënaqur që zhgënjimin e tyre ta kthejnë në mbështetje për kandidatë republikanë që ndajnë bindjet dhe qëndrimet e tyre politike.
