TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Iliana Yotova rezulton fituese e balotazhit presidencial në Bullgari, sipas rezultateve paraprake të numërimit të votave të publikuara të dielën.
Mediat e huaja shkruajnë se sipas përllogaritjeve të disa agjencive të sondazheve, Yotova ka siguruar nga 57.4% deri në 58.2% të votave, duke lënë ndjeshëm pas rivalin e saj, Andrey Gyurov, i cili ka marrë nga 38.6% deri në 39.6%.
Nëse rezultatet konfirmohen zyrtarisht, Yotova do të bëhet gruaja e parë e zgjedhur presidente në historinë e Bullgarisë.
Gara për postin presidencial, i cili ka kryesisht karakter përfaqësues, u zhvillua mes Yotovës, aleates së kryeministrit Rumen Radev, dhe Andrey Gyurov, bankier dhe ish-kryeministër në detyrë, i mbështetur nga opozita pro-perëndimore.
Pas publikimit të rezultateve paraprake, Gyurov pranoi humbjen, duke deklaruar se ky ishte vendimi i qytetarëve bullgarë dhe se rezultati duhej respektuar.
Lufta në Ukrainë, e cila po zhvillohet pranë kufijve të Bullgarisë, ka qenë një nga çështjet kryesore të fushatës zgjedhore në këtë vend, anëtar i NATO-s në krahun lindor të aleancës.
Gjatë fushatës, Yotova ka mbrojtur vazhdimisht një zgjidhje paqësore të konfliktit në Ukrainë përmes negociatave me Rusinë. Ajo e ka cilësuar veten si një “Presidente të Paqes” për Bullgarinë.
Në të kundërt, Gyurov ka shprehur mbështetjen për forcimin e marrëdhënieve me partnerët perëndimorë dhe për një përkrahje më të madhe ndaj Ukrainës përballë agresionit rus.
Zgjedhjet përbëjnë testin e parë të rëndësishëm për partinë “Bullgaria Progresive”, të kryeministrit Rumen Radev, e cila mbështeti kandidaturën e Yotovës. Kjo e fundit, 62 vjeçe, mori detyrën e presidentes në janar, pasi Radev dha dorëheqjen për të kandiduar në zgjedhjet parlamentare.
Vëzhguesit politikë presin që Yotova të vijojë politikën e Radevit për ruajtjen e orientimit evropian të Bullgarisë, duke synuar njëkohësisht përmirësimin e marrëdhënieve me Rusinë dhe heqjen e sanksioneve ndaj saj.
Procesi zgjedhor u zhvillua nën hijen e zhvillimeve të luftës në Ukrainë. Gjatë javëve të fundit, sulmet me dronë ndaj anijeve tregtare janë bërë gjithnjë e më të shpeshta në zonën ekskluzive ekonomike të Bullgarisë në Detin e Zi, si dhe në atë të Rumanisë fqinje.
Edhe pse presidenca bullgare ka kryesisht kompetenca ceremoniale dhe kreu i shtetit nuk ushtron pushtet ekzekutiv, zgjedhja e drejtpërdrejtë nga qytetarët i jep presidentit një autoritet të rëndësishëm politik.
Presidenti drejton forcat e armatosura, ka të drejtën e vetos ndaj ligjeve, nënshkruan marrëveshjet ndërkombëtare dhe emëron ambasadorët. Kreu i shtetit zgjidhet për një mandat pesëvjeçar dhe mund të ushtrojë jo më shumë se dy mandate.
