TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Trajneri i Barcelonës, Hansi Flik, rinovoi kontratën e tij javën e kaluar deri në vitin 2027 dhe këtë të premte dha një analizë të gjerë të sezonit të tij të parë në një intervistë të gjatë në “Barça One”.
Trajneri nuk e fsheh lumturinë e tij me rezultatin e përgjithshëm të sezonit, por ai kërkon të hedhë një hap më shumë. Ai synon Ligën e Kampionëve. Ai ka shpjeguar gjithashtu se periudha më e vështirë e sezonit ishin muajt nëntor dhe dhjetor, si dhe ndeshja kundër Espanjolit në të cilën Barcelona u kurorëzua zyrtarisht kampione e Spanjës, duke pasur parasysh gjithçka që përfshiu. Flik ka folur edhe për yllin 17- vjeçar, Lamin Jamal, duke e etiketuar atë një gjeni, por që duhet të punojë shumë për të qëndruar në elitë.
PËRMBLEDHJA E SEZONIT – “Dua të them se jam i lumtur, është mirë të shohësh se si po funksionon gjithçka. Është fantastike të punosh me këta lojtarë dhe me këtë klub. Në fund të fundit, Barcelona është gjithmonë kështu: duhet të fitosh tituj dhe në sezonin tonë të parë, fituam tre, dhe ishte një rezultat i mirë përfundimtar”.
VËSHTIRËSITË – “Nëntori dhe dhjetori nuk ishin të lehtë për ne, por ne qëndruam të qetë, sepse besonim në atë që po bënim. Ishte një kohë e vështirë, por në fund doli mirë”.
RINOVIMI – “Nga stili dhe filozofia me të cilën duam të luajmë, duam t’u japim lojtarëve dhe ekipit më shumë mundësi. Është gjithashtu shumë pozitive të flasësh me Bojanin (Kërkiç) dhe Dekon për vitet e ardhshme. Nuk bëhet fjalë vetëm për një sezon, por për të ardhmen. Mund të flasim edhe për sezonin 2026-27. Mendoj se është një hap i rëndësishëm përpara dhe për të vazhduar me filozofinë tonë”.
LAPORTA – “Jam këtu sepse ai më besoi dhe e tëra çfarë mund të bëj është të jap më të mirën time. Por nuk jam vetëm. Jam i rrethuar nga ekspertë të shkëlqyer dhe i ndihmojmë lojtarët të përmirësohen”.
RRUGËTIMI – “Ishte e pabesueshme. Pamë kaq shumë njerëz që qanin nga gëzimi, aq të kënaqur ishin me ekipin. Dhe kjo është madhështia e punës sonë, të qenit në gjendje t’i bëjmë njerëzit të lumtur, tifozët. Është shumë bukur t’i shohësh të lumtur. Plus, në rrugë nuk pamë vetëm të rinjtë duke festuar, por edhe tifozët më të vjetër treguan pasionin e tyre. Ishte shumë prekëse. Tani ndiej se kam një përgjegjësi të punoj përsëri shumë për sezonin e ardhshëm. Duhet ta bëj, sepse është puna ime dhe për ta”.
PËRPLASJET KYÇE – “Mendoj se ndeshjet më të rëndësishme nuk ishin ato kundër ekipeve të mëdha. Ishte ndeshja kundër Espanjolit, sepse e dija se do të ishte shumë e vështirë. Një ditë më parë, Reali kishte fituar dhe e dija se derbi do të ishte i vështirë. Më thanë se nuk do të ishte e lehtë, por ne luajtëm mirë. Espanjoli gjithashtu luajti shumë mirë. Por në fund, fituam dy gola nga Jamal dhe Fermin. Është mirë që i ke këta lojtarë të rinj në këtë nivel”.
LAMIN JAMAL – “Ai është gjeni. Është vetëm 17 vjeç dhe ne duhet ta ndihmojmë. Shpresoj që edhe ai ta dëshirojë këtë, që të kujdesemi për të sepse është shumë i ri dhe tani duket sikur gjithçka është e lehtë, por nuk është. Nëse dëshiron të luash në nivelin më të lartë për 15 vitet e ardhshme, duhet të stërvitesh shumë mirë dhe gjithashtu të jesh në kulmin e përgatitjes mendore. Kjo është gjëja më e rëndësishme. Ai është i zgjuar, inteligjent. Por nuk ka të bëjë vetëm me kënaqësinë; duhet të punosh shumë. Dhe lojtarët me këtë talent duhet ta bëjnë edhe këtë”.
RAFINJA – “E pashë për herë të parë në stadium dhe pashë se si luante. Sigurisht, i duhej besim. Ai ka potencial, por edhe zemër, mentalitet dhe cilësi”.
PEDRI – “Është fantastike të shikosh Pedrin duke luajtur. Loja përmirësohet me të. Më kujtohet dita kundër Valencias. Për mua, ai mund të jetë një nga liderët në vitet e ardhshme. Do ta ndihmoj të bëhet ai lider, sepse është një lojtar fantastik dhe mendoj se edhe ai mund të jetë një lider fantastik.”
PROGRESI – “Nuk ka të bëjë me përsosmërinë, ka të bëjë me përparimin. Kur e shoh ekipin të përmirësohet, të bëjë një hap më tej, kjo është ajo që dua. Ne jemi këtu për të ndihmuar çdo lojtar të nxjerrë më të mirën e tij. Ne përpiqemi të luajmë në nivelin më të lartë, dhe ky është niveli i Ligës së Kampioneve. Dhe duam të fitojmë Ligën e Kampioneve. E di që nuk është e lehtë, e di, por duhet të punojmë shumë dhe të qëndrojmë të bashkuar. Duhet të tregojmë se çfarë ekipi i shkëlqyer jemi, dhe mund ta tregojmë këtë në fushë, në mbrojtje, por edhe në sulm, dhe kjo është ajo që dua të shoh nga ekipi”.
